Mona, mercado de arte

O bar A Póla, no número 7 do Paseo de Alfonso (Vigo), acolle esta fin de semana a segunda parte da sexta edición do mercado de arte, deseño e ilustración MONA. Celébrase de venres 13 de decembro a domingo 15 desde as 16.30 horas ata
as 22.00 horas na terraza do negocio hostaleiro, a 200 metros da árbore xigante de Porta do Sol. Reunirá cada día a diferentes artistas que ofrecerán ilustración botánica, cerámica, acuarela, adhesivos, manga, serigrafía, xoiería elaborada a man, debuxo realista, roupa, pintura acrílica, láminas ou postais. A organización destaca que “se trata dunha gran oportunidade para comprar agasallos únicos a artistas locais ás portas do Nadal” e nun ambiente festivo.