Inauguración exposición EVA CASAIS

A marca de artesanía de Galicia “A Casa Rodante”, inaugura este xoves –07 DE NOVEMBRO  de 2024– unha EXPOSICIÓN DE EVA CASAIS. Dentro do marco da programación mensual que a marca de APAMP ofrece no seu Espazo Rodante: o local nº 7 da planta baixa do Centro Comercial A Laxe, en Vigo.

A exposición consta dunha serie de obras de cerámica e ilustración, cuxa temática xira en torno aos animais, representados de diferentes formas; xa sexa humanizados ou engalanados para cruzar o arco da vella, con destino á súa “Última Estación: O CEO”. Esta proposta xorde como unha extensión do novo proxecto “Estación O Ceo”, que consiste nun conxunto de obras muráis que a artista realizou decorando diferentes lugares da cidade olívica. En homenaxe a tódolos animais que abandonan este mundo sen ter optado á oportunidade de formar parte dunha familia.

EVA CASAIS é unha artista galega, polifacética a multidiscilplinar, cuxo traballo se centra en acuarelas, muráis e cerámicas. A súa obra desenvólvese sempre  dende a perspectiva de quen recoñece que a perfección como tal non é máis que un concepto, que desaparece ante a presencia da verdadeira creatividade. É por iso que nas súas creacións emprega liñas orgánicas e aparentemente imperfectas, de xeito que abre espazo ao azar, para finalmente integrar como parte das  súas obras,  todas aquelas manchas, tachóns ou pingueiras que amosan o dinamismo propio do proceso creativo.

Inclúese así unha nova parada do seu tren itinerante, no Espazo Rodante. A exposición “Última Estación: O CEO”, estará dispoñible no local do Centro Comercial A Laxe, durante todo o mes de novembro, dende o xoves, 07 a partir das 19:00h; momento no que a propia artista estará presente para explicar a historia detrás desta bonita iniciativa. Poderedes visitala exposición en horario de luns a venres, entre as 14:00 e as 21:00 horas e os sábados, dende as 11:00 ata as 15:00 horas.