'En la mesa no se canta', Collages do cociñeiro e artista Miguel Oliveira

Miguel Oliveira Unha proba da existencia dunha realidade real dentro da que estamos rexistrados; de testemuño de todo aquilo que se axita e vive fóra da nosa conciencia. Salvador Elizondo. A dedicación dos alquimistas en transcender os materiais cos que traballaban fixo que posteriormente derivasen nos actuais artistas e cociñeiros. O proxecto que Miguel Oliveira presenta na exposición Na mesa non se canta, é unha coherente continuación do seu propio desenvolvemento persoal, baseado na súa inquietude de ampliar as perspectivas do presente empregando a súa creatividade multisensorial. Miguel exprésase desde a súa propia vida e proxéctase no que fai. A súa actividade vital aúna cociña e creatividade en distintos aspectos que lle coñezo: Proxectos culinarios, deseño gráfico, comidas temáticas, arquitectura, fotografía e creación plástica.
As colaxes que compoñen a mostra recollen aspectos implicados nas distintas facetas do seu labor creativo: cociña, deseño, contexto e creatividade. A composición das súas imaxes fálannos dunha memoria próxima pero extinta, dunha experiencia recoñecible e amablemente superada. Onde o recordo e o empeño por regresar son a clave da razón de ser deste traballo. Parece neste conxunto de colaxes coma se Miguel transitase unido á realidade umbilical por dous extremos complementarios; o primeiro conectado ao lategazo enxebre de quen se recoñece harmonicamente territorial e o segundo, vén do tirón continuado da corda de cométaa que é a modernidade cosmopolita. No seu traballo queda reflectido a súa orixe e o ambicioso desexo de vivir a pulsión do momento coa incorporación dunha solvente novidade que aderece un vivente agora. E aínda sabendo que esa modernidade quedará superada, existe un inmenso interese vital por querer gozar
de moitas cousas alleas e distintas, que adiviñando a súa futura obsolescencia, sempre merece a pena o empeño da súa posesión para podelo gozar ao compartilo cos demais. Todo iso, con independencia do momento da súa adquisición ou a súa procedencia.