DESAFÍO AUDIOVISUAL ISLAS CIES – CIESTALENT

A inauguración será o 10 de marzo e a exposición estará dispoñible na Casa das Artes ata o 17 de abril

Na inauguración proxectaranse as 5 curtametraxes seleccionadas no II Concurso Audiovisual Cíes e farase público o ditame do xurado composto por tres referentes do audiovisual galego: Ana Gontad, Lucía Estévez e David Hernández. Os 5 fotógrafos explicarán os proxectos e farase un percorrido pola sala. Así mesmo, haberá unha exposición de grafiti en directo do comisario do certame de grafiti Powone. Para o peche do evento, contaremos con música en directo a cargo dos músicos integrantes do proxecto foto audiovisual de Nair Romero titulado “A Calma nun instante”

O II Concurso Audiovisual Illas Cíes é o resultado do desenvolvemento dos 5 proxectos de fotografía e vídeo que levaron a cabo nas Illas Cíes entre o 19 e o 23 de setembro de 2021. Durante estas datas, tanto os 5 fotógrafos como os 5 equipos de vídeo seleccionados conviviron nunha residencia artística nas Illas para producir alí as bases das pezas fotográficas e audiovisuais que agora presentamos. Os proxectos en ambas as seccións foron moi diversos. No campo da técnica fotográfica, o traballo transita desde a recuperación de procesos totalmente analóxicos ata o uso da realidade aumentada, produto da tecnoloxía máis contemporánea. No campo do vídeo tamén contamos cunha variedade de propostas que abarcan diferentes xéneros como o documental, a ficción e a narración máis intimista. O concurso CiesTalent-Grafiti creou un lugar de encontro para novos talentos emerxentes e artistas internacionais consagrados. Participantes seleccionados e artistas invitados compartiron muros, técnicas e experiencias que quedaron plasmadas nos muros de Navia. Un programa de arte urbana colaborativa que rexenerou espazos públicos degradados e converteunos en obras de arte efémeras. Pola súa banda, o conxunto de obras presentadas no Certame CiesTalent-Cómics mostra a gran calidade dos autores galegos de historietas, cunha gran variedade de estéticas, gráficas e temáticas. Trátase dunha exposición que sitúa o cómic na arte contemporánea e enmárcao como unha canle moi apropiada para a difusión do noso patrimonio dunha forma amena e interesante para todas as idades.