Cadernos da Limia: Mariana Carballal e Blas González

O próximo 15 de Novembro ás 20.00 inaugúrase na Sala Apo’strophe de Vigo a exposición “Cadernos dá Limia: Paisaxe, Identidade e Memoria” do fotógrafo vigués Blas González. 

A partir dos recordos que fuxían da memoria da súa nai, o autor iniciou a procura da desaparecida Lagoa de Antela, explorando o impacto que a desecación deste importante humidal tivo na paisaxe da comarca ourensá e as consecuencias emocionais desta actuación cuxos devastadores efectos aínda perduran na memoria colectiva. Ademais da fotografía de paisaxe, a exposición inclúe unha serie de 130 retratos de persoas da Limia, tomados entre os anos 2017 e 2022, e que constitúen o eixo central da triloxía “Cadernos da Limia”, no que pretende ser unha “cartografía humana” da comarca limiana. Segundo o autor, “a paisaxe, identidade e memoria, configuran o corpo deste proxecto fotográfico que me levou nunha viaxe emocional ás terras limianas. A identidade como tecido de natureza sutil, tramado cos fíos invisibles da memoria e vinculado os lugares que habitamos”. Unha selección de fotografías intervidas pola artista británica Lotta Ellis e documentos procedentes de arquivos fotográficos familiares completan os cadernos limianos na sección titulada “Interseccións”. 

A exposición, que permanecerá aberta ata o próximo 11 de xaneiro de 2025, programará charlas, presentacións, recitais e concertos, en resonancia coas claves que se propoñen no subtítulo da exposición:

Nancy Blanco, da asociación Amigas das Cegoñas e  colaboradora activa da Rede Natura, presentará “A Sendas das Cegoñas”, un percorrido en clave medioambiental polo presente da Limia (29/11/2024).

Co making-of dos Cadernos de Limia como escusa, Mariana Carballal e Blas González conversarán en aberto sobre as claves do proxecto e doutras conexións emocionais (13/12/2024).

“A Dama da Lagoa” convoca o colectivo poético Desafiando Sombras que exploran as narrativas de empoderamento feminista que promove a mítica figura limiana (18/12/2024).

“Ourensividad: Nutrición e lonxevidade” é o título da conferencia que impartirá Pablo García Vivanco, nutricionista e divulgador, sobre os beneficios que proporciona a dieta mediterránea. A actividade inclúe unha cata de aceites (19/12/2024).

Xabier Domínguez, Alba de Evan e Miguel Alonso Diz  presentarán Antela Editorial, un proxecto editorial nacido baixo o topónimo da Lagoa e que reivindica a riqueza do patrimonio natural e cultural da comarca en clave de literatura infantil (3/01/2025).

Por fin, Iria Bragado, Rafael Yebra e Andrea González poñerán o peche poético e musical á exposición, recreando as paisaxes sonoras inspiradas polos Cadernos da Limia (10/01/2025).