Celebrarte
![](https://amovida.gal/wp-content/uploads/2024/05/celebrarte.jpg)
A parella de Javier Álvarez e mais el buscaban un local acondicionado para organizar unha festa de aniversario para a súa filla e non o daban atopado. Entón decidíronse a facelo eles mesmos. Estes veciños de Teis atoparon un local que quedou libre na zona, convertérono nunha especie de apartamento con salón, cociña e unha zona infantil equipada cunha casa de madeira con tobogán e unha cama elástica. A diversión tamén está servida para o público adulto, cunha diana de dardos, un televisor e unha máquina recreativa con máis de 5.000 videoxogos retro. O local pódese alugar por horas coa intención única de que grupos familiares ou de amigos desfruten dun tempo de calidade sen preocuparse por máis nada.
![](https://amovida.gal/wp-content/uploads/2024/05/celebrarte3.jpg)
Desde que se inaugurou en xaneiro, Celebrarte case non tivo unha fin de semana libre. «Sabemos que para os pais non é agradable ver chorar os nenos por non querer marchar, pero para nós é síntoma de que o pasaron ben», comenta Javier con orgullo. Froito do boca a boca dos pais e nais dos colexios da zona, reciben moitas reservas para aniversarios infantís, pero Javier quere deixar claro que Celebrarte é para todas as idades: «Se das unha charla ou impartes un obradoiro esporádico, aquí tes onde facelo».
![](https://amovida.gal/wp-content/uploads/2024/05/celebrarte2.jpg)
Abren todos os días da semana en tres faixas horarias: mañá, mediodía e tarde. Pero tamén ofrecen a posibilidade de alugar o día enteiro. Avistan a temporada de verán sen medo e con algunha reserva xa programada. «O lugar é fresco e pode servir como alternativa para os días de moita calor», apunta Javier, que engade que, se o negocio funciona ben, ten outra ilusión a longo prazo: dispoñer dun local con terraza para os días de sol.
![](https://amovida.gal/wp-content/uploads/2024/05/celebrarte4.jpg)
celebrartevigo.com | 604 02 79 07 | celebrarte.vigo
Érika Martínez
Redactora
Lara Alonso
Fotógrafa