Bazares nos Bares reúne as mellores propostas locais para lucir este verán – A Movida

Bazares nos Bares reúne as mellores propostas locais para lucir este verán

Nova edición de Bazares nos Bares este sábado. Churruca volverá converterse nun gran bazar no que artesáns, deseñadores e artistas locais presentarán as súas creacións ante o público vigués. Ademais, haberá actividades e obradoiros nos que pequenos e maiores poderán deixar voar a súa imaxinación.

Churruca tamén vive de día. Ese é o lema de Bazares nos Bares que chega, con esta, a súa VI edición. A cita é este sábado, dende as 12 da mañá ás 10 da noite, once locais da zona se converterán en bazares por un día nos que se darán a coñecer os traballos de artistas locais. Haberá: ilustración, escultura, pintura, cerámica, coiro, xoiería, traballos en madeira, roupa, moda vintage, complementos, xardinería, decoración, cómics, libros, vinilos, cosmética natural, produtos ecolóxicos…
Ademais, durante toda a xornada haberá actividades e obradoiros pensados para que tódolos asistentes deixen voar a súa imaxinación e se convertan, eles mesmos, en creadores de arte. As actividades están dirixidas ao público de tódalas idades. Nesta nova edición do festival, haberá un obradoiro de papiroflexia, a cargo de Orikiku; os asistentes poderán crear a súa lámina “Rosalía de Castro”, coa axuda de Arte Miuda. Haberá xogos con xices de cores na rúa en varios puntos do itinerario entre locais; quen queira pode sacar a súa vena artística e deixar a súa pegada na parede creativa que se habilitará xunto ao Reserva Rock; os deseñadores de La Canalla dirixirán un obradoiro téxtil; haberá manicura personalizada a cargo de “Rania Shop” e Josef Mendez (Horror Art) fará unha creación en directo.
Os locais participantes nesta edición de Bazares nos Bares son: Reserva Rock, Korova, Tinta Negra, Sala Magnética, Batallón Baiuca, La Casa de Arriba, Bizarre, Cantina Candela, El Velero, Brewing Records e Apiramoria.

02xuñ12:00Bazares nos baresMERCADO URBANO | De balde12:00 Churruca

Compartir
X