bannerRevistaOnline

A Sede Afundación de Vigo acolle as fotografías do Premio Estação Imagem

O Premio Estação Imagem é un prestixioso certame internacional de fotografía, cuxo obxectivo é promover o xénero da reportaxe fotográfica. Estará dispoñible na Sede Afundación ata o 30 de marzo, de 17:30 a 20:30.

Estação Imagem é unha asociación cultural portuguesa que organiza cada ano este Premio Internacional de Fotoxornalismo para promover o xénero da reportaxe fotográfica. A participación neste certame está aberta a fotoxornalistas orixinarios ou residentes en Portugal, Galicia ou nos chamados PALOP, Países Africanos de Lingua Oficial Portuguesa.

Banner A Movidiña

Trátase dunha exposición fotográfica conformada polas imaxes gañadoras do certame, único na Península Ibérica e un dos poucos certames que se realizan en todo o mundo enfocados á reportaxe fotoxornalística. Un xénero caracterizado en moitas ocasións pola dureza e a honestidade das súas imaxes, cun compoñente humano único.

Nesta mostra exhíbense as series fotográficas gañadoras do certame de 2018, que consta de 77 imaxes distribuídas en 22 paneis. O Prémio Estação Imagem 2018 Coimbra recaeu na serie Verão negro, de Patrícia de Melo Moreira e o premio á «Fotografía do ano» foi para O frío dos Refuxiados, do fotógrafo galego Gabriel Tizón. Nesta edición outorgáronse así mesmo dúas Mencións de Honra ás imaxes Incendios, de Nuno André Ferreira e Bons amigos, de Filipe Amorim. Tamén se mostrarán as reportaxes gañadoras nas categorías de Noticias, Temas de actualidade, Vida cotiá, Artes e espectáculo, Ambiente, Retratos, Deportes, Noroeste Peninsular e Premio Europa. Ademais, exhibirase a serie Minhotos, premiada coa bolsa do ano 2017, obra do fotógrafo Leonel de Castro, un proxecto documental sobre o Alto Miño.

Un xurado internacional, presidido por Santiago Lyon, presidente do World Press Photo 2013 e director de contidos editoriais de Adobe, foi o encargado de decidir os premiados. Os outros membros desta edición foron Sara Naomi Lewkowicz, fotoxornalista americana recoñecida polo seu traballo sobre violencia doméstica e familias LGTBQ e gañadora de dous World Press Photo; Marco Longari, fotoxornalista de AFP para África e Tania Habjouqa, fotógrafa documental especializada no medio ambiente e gañadora tamén dun Word Press Photo.

X