Festival de Cans, Sondeseu, Mocedades e festa de fin do Centenario do Celta esta fin de semana
Fin de semana repleta de música local nos teatros, salas e mesmo nas inmediacións de Balaídos, co fin de festa do Centenario do Celta. Tampouco faltan o teatro, monólogos ou o Festival de Cans. Preme no título de cada evento para máis información. Se queres coñecer todos os eventos que hai esta fin de semana entra na axenda de A Movida.
FESTIVAL DE CANS – De xoves a sábado en Cans – Varios prezos
O martes 21 comezou a XXI edición do Festival de Cans, o evento de cinema, música e agroglamour que se celebra na vila porriñesa desde hai dúas décadas coincidindo en datas co seu irmán francés de Cannes. O festival, de martes a sábado, ofrece unha variada e ampla programación de proxeccións, coloquios, concertos e roteiros. Podes consultar aquí toda a programación e tamén mercar as túas entradas.
MAN A MAN DE SILVIA PENAS E SAMUEL MERINO – Venres ás 20:00 en Maraca – Caixa inversa
Este “man a man” de Silvia Penas e Samuel Merino xorde da vontade de levar a palabra falada á súa forma máis espida, de darse, de ofrecerse. O ”man a man” non é unha competición, as palabras non batalla aquí e as voces non se levantan en armas de guerra. Máis ben, este falar é un paseo de mans dadas no que, por momentos, imponse a necesidade de camiñar en solitario e, en ocasións, a de conversar e escoitarse para que a poesía fágase a súa propia viaxe. Na fala da xente.
CONCERTO SONDESEU – Venres ás 20:30 no Teatro García Barbón – Desde 12,00€
Entreterras é o novo proxecto de SonDeSeu, no que a Orquestra Folk de Galicia se acompañará de artistas comprometidos coa innovación e o respecto ás músicas tradicionais dos seus territorios. A galega SÉS, o portugués Daniel Pereira e o canario Hirari Afonso compartirán escenario co medio cento de intérpretes de SonDeSeu nesta nova proposta musical.
CONCERTO ISIUS – Venres ás 20:30 en Radar – Desde 11,00€
Alá por 2022, o grupo vigués ISIUS fantaseou coa posibilidade de visitar Abbey Road para o seu próximo traballo. A axenda do escenario marcou os tempos e, finalmente, o pasado mes de decembro Jacobo de San Claudio, Alejandro Enríquez, José Viqueira, Carlos Gil e Edu Romero viaxaron a Londres para cruzar a porta do Estudo 2. Alí, no icónico lugar no que naceu a lenda de The Beatles, ISIUS gravou o seu cuarto disco, que presenta este venres na sala Radar.
CONCERTO MODULADORES – Venres ás 21:30 no Sinattra Club – 10,00€
Trátase dun novo proxecto instrumental que navega por diferentes estilos dun xeito pouco convencional, fusionando surf e electrónica entre moitas peculiaridades, como o uso melódico do theremin. Os seus integrantes, vellos coñecidos da escena local, son Nico Rodríguez á batería, Pablo Muñiz ao baixo, Xavier Soto á guitarra, Paulo Pascual ao theremin, guitarra e sintetizador. Usan sons exóticos, experimentais, etc., xigantescos. Fano coa porta sempre aberta a novas ondas. Elaboran as súas propias composicións nun momento no que parece que o contrario é a norma. Presentan o seu primeiro traballo, un casete homónimo de catro temas.
PUM PUM. QUEN HAI? – Sábado e domingo ás 18:00 na Sala Ártika – Desde 8,00€
Dúas portas enfrontadas, un novo veciño no edificio, moito por descubrir e moito poraprender. Quen será e de onde virá? Que valores aprenderás véndonos rir e bailar? Unha historia divertida na que o ritmo da comedia te levará a descubrir que cando non todo é o que parece, a vida se conevrte nunha aventura maravillosa.
DAVID PUERTO ‘PIZPIRETO’ – Sábado ás 20:00 no Teatro García Barbón – Desde 12,00€
Pizpireto, un show de comedia alegre, vivaz e algo coqueto (ou iso di a RAE). Está orquestrado por David Puerto, un cómico que fai das súas reflexións e vivencias un espectáculo de comedia, buscando o lado positivo da vida, se é posible, ou polo menos o lado gracioso. Facendo uso do monólogo clásico (Stand-up), improvisación (crowd work) e comedia musical. Un show cheo de interacción co público, vandalismo, elegancia… todo moi pizpireto.
CONCERTO THE SKARNIVALS + LISKA! – Sábado ás 21:30 na Sala Masterclub – Desde 12,00€
The Skarnivals, con case 10 anos de traxectoria, son un dos referentes do ska feito en Galicia, sempre dentro do seu propio e particular estilo con toques folk, onde a gaita/whistles comparten espazo musical cos ritmos ska e punk-rock característicos do xénero. O concerto de Vigo forma parte da súa xira de despedida, pois os galegos anunciaron a semana pasada, a través das súas redes sociais, que se separan sen data de volta. LISKA! é unha das bandas con maior antigüidade do panorama ska/punk galego. Ritmos festivos, letras comprometidas coa súa terra e a súa xente son as cartas de presentación.
FESTA FIN DE TEMPADA DO CENTENARIO DO CELTA – Domingo desde as 11:00 en Balaídos – De balde
O RC Celta despide a tempada do seu Centenario, coa permanencia xa lograda, por todo o alto. Os arredores do estadio de Balaídos serán unha festa na que non faltarán zona gastronómica, animación infantil, outlet de roupa do equipo vigués e a música de de Batea, A Roda, Groove Amigos e Festicultores.
CONCERTO MOCEDADES + LOS PANCHOS – Domingo ás 20:00 no Mar de Vigo – Desde 38,00€
Mocedades naceu na cidade de Bilbao, a finais da década dos anos sesenta. Foi fundado polas irmás Uranga no seo dunha familia numerosa cargada de moito talento musical e que xunto a outros amigos crearon o grupo vocal máis importante do mundo de fala hispana. Izaskun Uranga, fundadora do grupo é a única integrante que permaneceu de maneira ininterrompida desde a súa fundación ata os nosos días. Mocedades están a celebrar as súas máis de 50 anos xunto ao Trío Los Panchos, representados pola súa última primeira voz, Rafael Basurto Lara. Eles son un referente mundial do bolero e a balada romántica.