CAMELIAS MASCOTAS

‘O raro é que bailar sexa raro’, de VACAburra

Publicado o por

«VACAburra é a colisión de dúas artistas, unha vaca e unha burra, nun proxecto coreográfico en clave contemporánea». Andrea Quintana (alias «Variopinta») e Gena Baamonde (alias «Mullerona») chegan á sala Ártika coa peza O raro é que bailar sexa raro, unha celebración da danza e da diversidade que racha con calquera canon.

Foto: JC Arévalo

Neste espectáculo unipersoal, Quintana ensina ensinándose, nunha posta en escena das súas destrezas físicas, mais tamén das súas eivas, sen renunciar á poética do corpo queer, do corpo diverso, do corpo alén do «normal» para axitar o ollar burgués e normativo que temos. As voces de creadoras como a escritora Joana Russ ou como as activistas LGBT+ Linn-Liniker resoan nunha dramaturxia cun discurso directo e potente, en que as estratexias de visibilidade, as identidades disidentes e a ficción bastarda se unen para artellar unha «coreo-biografía-pirata» que se desenvolveu ao abeiro do programa das Residencias Paraíso do Colectivo RPM.

Davide González no espazo sonoro, Baltasar Patiño na iluminación, A muller de 6 ollos na imaxe e Saturna no vestiario completan o equipo desta produción recomendada por Redescena, a Rede Española de Teatros, Auditorios, Circuítos e Festivais de Titularidade Pública. Danza autobiográfica, danza contaxiosa, danza incómoda, danza plural, danza provocativa, danza revolucionaria; danza con vontade de comunicar, de remexer conciencias, de transcender. Como din no colectivo VACAburra, «isto vai de bailar bailando».

REVISTA NOVEMBRO

Data e hora: sábado 16 e domingo 17; ás 20:00 h

Lugar: Sala Ártika

Entradas: 10,00 € (anticipadas); 14,00 € (billeteira)

The following two tabs change content below.
My LinkedIn profileMy Instagram profile

Ernesto Is

É dramaturgo, narrador oral e docente. Premio Abrente (ex aequo) con 'Fendas' e Premio Rafael Dieste con 'Despois das ondas'. Foi seleccionado polo INAEM no Programa Dramaturgias Actuales ('El hombre que soñaba con elefantes en las estrellas'), no grupo de escrita teatral DramaturXA do CDG ('Onde veñen morrer as baleas') e na bolsa Nuevas Dramaturgias de Euskadi ('Canciones amarillas para flores tristes'). Cofundador da compañía Feira do Leste, coa que estreou 'Exilio das moscas' e 'Tras Tannhäuser' (axudas á Creación Joven do INJUVE). Membro do consello de redacción da erregueté | Revista Galega de Teatro, colabora tamén coa Revista Grial e A Movida de Vigo.