VII Certame de Rondallas da área metropolitana de Vigo

O VII Certame de Rondallas da Área Metropolitana de Vigo terá lugar o 18 de xaneiro coa participación de 14 agrupacións procedentes de Vigo, Mos, O Porriño, Gondomar, Nigrán e Tui, e reunirá, tendo en conta as anteriores edicións, unhas 5.000 persoas no IFEVI.

A particularidade das rondallas da provincia de Pontevedra é a substitución dos instrumentos de corda, propios destas agrupacións noutros lugares, por outros máis tradicionais en Galicia como cunchas, charrascos, pandeiretas e castañolas. Estas agrupacións, formadas por un centenar de rondalleiros cada unha, son típicas do Nadal e teñen un amplo repertorio no que inclúen temas do folclore galego e no que tampouco faltan reinterpretacións de temas da música actual.

O Certame de Rondallas da Área Metropolitana de Vigo é un evento moi multitudinario no que cada agrupación participante ten un tempo limitado para a súa actuación na que ademais da interpretación musical, se valora a vestimenta, a variedade de instrumentos ou a coreografía que os rondalleiros fan mentres tocan. En total distribúense seis premios; ás tres mellores rondallas e aos tres mellores conxuntos de abandeirados.

As 14 rondallas participantes nesta edición son:

Pexegueiro (Tui)
Zamáns (Vigo)
Beade (Vigo)
Pontellas (Porriño)
Atios (Porriño)
Santa Eulalia (Mos)
Torroso (Mos)
Valadares (Vigo)
Herville (Mos)
Bembrive (Vigo)
Chain (Gondomar)
Guizán (Mos)
Vincios (Gondomar)
Parada (Nigrán)