Pre-Benidorm Fest: Karmento

O sábado 18 de xaneiro é o día fixado polo Plaff (Rúa Oliva 8 baixo) para celebrar a edición Pre-BenidormFest2025 das súas “Eurovision PetardPop Party”. A estas festas, moi coñecidas polos eurofans de toda España, xa pasaron artistas eurovisivos do talle de Lucía Pérez, Anabel Conde, Suzy Guerra, Eva Santamaría, Brequette, Nicki French e Aiko moi recentemente.

Neste caso os eurofans que se acheguen poderán gozar en directo da actuación de Karmento, finalista do Benidorm Fest 2023 coa súa canción “Quiero y duelo” grazas ao unánime apoio do público. É unha artista manchega de raíz, e que combina o pop co folclore máis vangardista.

No seu último disco La serrana, Karmento inspírase nas mulleres do seu pobo e na súa propia identidade. Profunda na súa raíz serrana nunha viaxe emocional e narrativa que atravesa a vida e a memoria da súa pertenza.

Todo este ano 2024 estivo inmersa na xira de presentación do seu último disco, que a levou por gran parte da xeografía española e a países como Chile, Arxentina, Brasil, Paraguai, Tunes ou Alxeria. A actuación no Plaff! será unha oportunidade única de ter a Karmento en exclusiva en Galicia por primeira vez nesta xira de concertos.

Karmento virá acompañada por un dos seus músicos e ofrecerá un concerto en acústico que promete explotar as emocións dos que alí se congreguen.

A actuación no Plaff será ás 23:30 h e as entradas venderanse en porta o mesmo día desde as 20 h a un prezo de 12€ (consumición incluída) ata completar o aforo. Para redondear a festa, habilitarase unha zona de photocall á entrada do local, e haberá agasallos por parte dos patrocinadores (Absolut, Porto de Indias, Hotel Inffinit Vigo, Macho Underwear e Wapo App).

Posteriormente á actuación, coma sempre, haberá unha videosesión especial a cargo de DJ X.avi PetardPop que repasará a historia do festival e fará as delicias dos eurofans que alí se congreguen.