Volven as PICNIC SESIÓNS a Saiáns! O sábado, 5 de abril, e o domingo, 6 de abril, celébrase O Festival de Saiáns nos antigos terreos da radio Costeira de Saiáns (Baixada á praia, 83), un evento que combina natureza, cultura e comunidade.

Co fin de recadar fondos para o festival, véndense rifas a 2,00 €, coas que poder gañar premios do Rei Zentolo, Guías Malouco e Escola Patos surf. Pódense conseguir en:

• Panadería Kami, Saiáns
• Bar Alegría del bollo, Saiáns
• Tapería O druída, Nigrán
• Escola Patos surf, Nigrán
• Bar Alberdi, San Miguel

As PICNIC SESIÓNS son un deses festivais de pequeno formato, ideais para pasar unha xornada en familia, nun espazo agradable e con boa música. As anteriores edicións, que se celebraron en meses variados, gozaron dunha moi boa acollida debido á variedade de actividades e á interesante programación musical. Polo seu escenario, pasaron artistas e grupos como Family Folks, The Manueles, Su Garrido Pombo, Black Stereo, Nadie González, The Mirror ou Peter Punk.

Esta cuarta edición ofrece:

Sábado, 5 de abril

• Un roteiro forestal da man da Comunidade Montes de Saiáns que sairá ás 16:30 h do parque forestal.

Domingo, 6 de abril

• O certame de pintura rápida Mingos Teixeira, para todas a idades a partir dos catro anos (é necesario inscribirse previamente en pinturarapida@picnicsesions.gal)
• Un mercado contemporáneo
• Varios obradoiros artesanais (é necesario inscribirse previamente contactando cos organizadores de cada un)
• Un espazo familiar gratuíto, da man de Kenguru, para nenos entre cero e sete anos (acompañados por un adulto)
• Piedra, papel, tijera, un novo torneo da man de Olga Méndez, para maiores de once anos (é necesario inscribirse o mesmo día do festival no stand de merchandising)
• Un posto de tatuaxes e maquillaxe
• Diversos concertos e actuacións musicais

Ademais, de maneira especial, o evento recada fondos para o caso de Mauri, un neno veciño de Nigrán ao que lle diagnosticaron a enfermidade de Alexander. Os cartos recadados serán destinados á investigación para curar e tratar esta doenza.