O vindeiro martes 15 ás 19:00 h no Museo do Mar de Galicia en Vigo terá lugar o concerto inaugural do ciclo DOAUDIBLE25.

DOAUDIBLE25 presenta en exclusiva A ARTE DO GUNZHENG, unha produción orixinal que inclúe varias colaboracións internacionais.

Unha colaboración coa Bienal de Zagreb e o Hong Kong New Music Ensemble que procura a integración do Guzheng, cítara tradicional chinesa, símbolo do taoísmo e das clases populares, nun contexto de música nova. É tamén unha oportunidade para achegarnos á cultura de Hong Kong e a poesía chinesa tradicional e desfrutar das últimas creacións de Sonja Mutić (Cro/Serbia), Angus Lee (HK), Camilo Mendez (Colombia/HK) e Pilar Miralles. Completará o concerto a lectura dunha selección de poemas Ci da poetisa da dinastía Song, Li Qingzhao (1084-c. 1155). Íntimamente ligados coa música, os poemas Ci (literalmente “palabras de cancións”) foron compostos para unha melodía preexistente, agora perdida.

DOAUDIBLE25 é un ciclo de concertos promovido por Vertixe Sonora, que procura a normalización da escoita de música contemporánea no noso territorio. A investigación de puntos de encontro entre a música, a ciencia, a tecnoloxía, a arte e o pensamento é o eixo central do ciclo, que busca favorecer o achegamento do público non especializado á creación artística contemporánea.