Sen Senra en Castrelos

O músico de Forcarei Sen Senra, que medrou en Vigo co fútbol e a música como grandes paixóns, é a cuarta confirmación para este verán en Castrelos. Actuará o xoves 25 de xullo no auditorio vigués, convertíndose nun dos poucos artistas galegos en actuar en Castrelos nos últimos anos.

Christian Senra, o seu nome orixinal, formou aos 15 anos a banda de garage Demonhigh, publicando o disco Corazón ardiente en 2014. Ao ano seguinte xa publicou o seu primeiro disco en solitario baixo o nome de Sen Senra, Permanent Vacation. O segundo, Art of Self-Pressure (2017) segue unha liña similar, formando un díptico de indie rock con cadencia lo-fi e surf.

O éxito a nivel estatal chegoulle en 2019 con Sensaciones, un deses traballos que marcan un punto de inflexión na vida dun artista. Este álbum está moito máis orientado ao pop electrónico e ao R&B. En xaneiro de 2022 reuniu a máis de 6000 persoas no Wizink Center de Madrid. En outono de 2023 realizou tres concertos nos Estados Unidos, presentando o seu último disco PO2054AZ (Vol.I).

Na actualidade é un dos músicos galegos máis relevantes do panorama estatal.

Entradas á venda o martes 16 de xullo

A venda para o cuarto dos concertos do Vigo en Festas 2024 terá lugar o vindeiro martes 16 de xullo, seguindo o novo sistema posto en marcha polo Concello de Vigo. Poderanse adquirir un total de 5.000 localidades, 4000 de xeito presencial no Auditorio de Castrelos e 1000 en liña.

Para facilitar o acceso de toda a cidadanía, independentemente do seu horario de traballo, as entradas sairán en dúas quendas (en horario de mañá de 9:00 a 14:00 horas e pola tarde de 16:00 a 21:00 horas). En cada quenda estarán á venda 2000 reservas físicas e 500 de xeito online a través de www.vigoenfestas.cliqueo.es.

Cada persoa poderá retirar 4 reservas nominativas, co que terán que acudir cunha copia do DNI (ou outro documento identificativo) das persoas para as que queira adquirir a reserva. No caso do artista galego o prezo será de 10€.

Programación de Castrelos e os cachés dos artistas

13 xullo – Dani Fernández – 121.000 €
17 xullo – Una casita con encanto (infantil) – 18.137,90 €
20 xullo – Coral Casablanca – 44.165 €
23 xullo – Luis Fonsi – 245.630 €
25 xullo – Sen Senra – 116.765 €
31 xullo – Las orejas de mariposa (infantil) – 10.012,75 €
2 agosto – Luz Casal – 167.585 €
3 agosto – Aitana – 786.500 €
5 agosto – La cajita de los sueños (infantil) – 17.774,90 €
7 agosto – UB40 – 291.368 €
9 agosto – Ópera: Rigoletto – 48.763 €
12 agosto – Cantajuego (infantil) – 46.101 €
14 agosto – Víctor Manuel (sinfónico) – 205.700 €
16 agosto – Vetusta Morla e Xoel López – 332.750 €
17 agosto – Melendi – 350.900 €