O vindeiro 3 de abril ás 18:00 horas no teatro do CIFP Audiovisual de Vigo, o talento e a creatividade do alumnado serán os protagonistas nunha nova edición dos Premios Ostras de Pedra. Este evento, xa consolidado no audiovisual vigués, premia aos mellores documentais realizados polos estudantes de segundo curso do centro, poñendo en valor o seu esforzo, creatividade e capacidade de narrar historias a través das imaxes, e contando co criterio de profesionais recoñecidos no mundo do audiovisual galego.

Os Premios Ostras de Pedra, que van pola súa novena edición, convertéronse nunha cita imprescindible para a comunidade educativa e para os amantes do audiovisual, e unha valiosa plataforma de práctica para o estudiantado dos ciclos de Produción, Realización, Son e Imaxe. A través dos seus traballos, os estudantes exploran diversas temáticas e realidades, demostrando a súa habilidade narrativa con sensibilidade e técnica audiovisual.

A cerimonia de entrega de premios proxectará os documentais nomeados e destacarase a evolución do talento audiovisual no centro e dende a organización, convídase a toda a comunidade educativa e ao público interesado a participar neste evento, que promete ser unha mostra do gran potencial dos futuros creadores audiovisuais.