Poesía, fotografía e música para celebrar o 100 aniversario de Carlos Oroza

Este sábado o poeta Carlos Oroza cumpriría 100 anos. A asociación viguesa que leva o seu nome celébrao cun recital de poesía, unha exposición e a actuación de Cintaadhesiva.

Os actos serán os días venres 12 de maio e o sábado 13. O local da Asociación Évame Oroza está situado na rúa Subida á Costa, 5, no Casco Vello Alto de Vigo.

Se queres coñecer máis sobre Carlos Oroza, o poeta beat de Vigo, podes ler este artigo que lle dedicamos na revista de abril.

Programa:

Venres 12 ás 19h – Local Asociación Évame Oroza – Recital aberto e colectivo da obra de Carlos Oroza. O acto acabará cun brinde polo aniversario de Oroza.

Sábado 13 ás 10h – A Laxe, a carón do Club Náutico – Inauguración da exposición itinerante que celebra o aniversario de Oroza. Trátase dunha mostra de seis cubos para exterior que, a través de imaxes e texto, fan un percorrido pola vida e obra do poeta. Durante a inauguración participarán Branca Novoneyra, comisaria da exposición, e Xabier Romero, presidente da asociación. Branca Novoneyra fará unha visita guiada da mesma e rematará o acto coa lectura dun poema. A exposición estará situada ao carón do Club Náutico, onde permanecerá ata o 19 de xuño.

Sábado 13 ás 18h – Local Asociación Évame Oroza – Actuación do dúo poético-musical Cinta Adhesiva (formado pola poeta Silvia Penas e o músico Jesús Andrés Tejada) que contará coa conexión en directo de Marina Oroza, quen se atopa en Nova Iorque participando do Festival Kerouack.