A Foreign Song, o último filme do director galego César Souto, chega a Vigo cunha proxección especial este luns 28 de abril ás 20:00h nos Multicines Norte, que contará coa presenza do propio cineasta para un coloquio posterior co público.

Este documental mergúllase na obra do poeta estadounidense Wallace Stevens, unha das figuras máis singulares do modernismo literario. A través dunha mirada íntima e coidada, o filme explora os territorios da identidade, a creación e a memoria.

A Foreign Song está producida por Matriuska Producciones, unha das produtoras galegas máis recoñecidas no ámbito do cinema de autor. Cun catálogo que aposta por obras cunha forte pegada artística e sensibilidade contemporánea, Matriuska avala unha vez máis, con este proxecto, o seu compromiso cun cine valente, poético e internacional.

O filme foi recoñecido co Premio á Mellor Película Española e Mellor Dirección no Festival Internacional de Cine de Xixón 2022, ademais de ser finalista nos Premios Mestre Mateo 2023 nas candidaturas a  Mellor Documental, Dirección de Fotografía e Dirección de Produción.

Esta cita en Vigo representa unha oportunidade única para achegarse a un cinema de alta calidade artística, acompañado da visión persoal do seu director nun coloquio aberto ao público.