Jethro Tull

A lendaria agrupación Jethro Tull actuará na cidade de Vigo o próximo 27 de maio. A cidade olívica será unha das paradas da xira internacional de presentación do seu novo álbum de estudo, ‘RökFlöte’, que saíu á luz o pasado 21 de abril. As entradas para a cita, que terá lugar no Auditorio Mar de Vigo, quedan moi poucas entradas dispoñibles e están á venda a través da plataforma web www.teuticket.com.

Tras a publicación en 2022 de ‘The Zealot Gene’, o seu primeiro álbum en dúas décadas, o grupo de rock progresivo liderado por Ian Anderson recalará en Vigo para dar a coñecer un disco inspirado nos deuses da mitoloxía nórdica que serve como homenaxe á frauta, instrumento característico da banda británica. Durante o concerto, que comezará ás 20.00 horas, a banda tamén revisará algúns dos seus grandes éxitos.

Jethro Tull irrompeu nos anos 60 cun son novo e irresistible que supuxo un gran impacto global. A comezos de 1968, un grupo de músicos británicos que compartía a súa paixón polo blues e outras formas musicais decidiu reunirse e conquistar ao público de diferentes pubs e clubs do sur de Inglaterra.

Coa publicación do seu primeiro álbum, ‘This was’, (1968), a banda mostrou unha clara orientación ao blues, para evolucionar cara a sons máis locais e eclécticos con ‘Stand up’ (1969). ‘Benefit’, ‘Aqualung’ e ‘Thick As A Brick’ continuaron a súa traxectoria e o éxito da banda comezou a crecer a nivel internacional. Varios membros da banda foron e viñeron, pero o seu carismático líder, o compositor, flautista e cantante Ian Anderson, continuou liderando o grupo a través das súas diferentes creacións musicais.

Jethro Tull foi, cara a mediados dos 70, un dos grupos máis exitosos do directo internacional, rivalizando con Led Zeppelin, Elton John e ata The Rolling Stones. O seu éxito resultou sorprendente, xa que se trataba dun grupo sofisticado e cunha extravagancia estilística moi evolucionada que os situaba lonxe do pop e rock daquel momento.

Con máis de 30 álbums ás súas costas e unhas vendas que superan os 60 millóns de copias, Jethro Tull continúa viaxando por todo o mundo para deleite dos seus seguidores. Tras 50 anos, os contundentes directos da banda destacan pola súa posta en escena, que combinan un impactante deseño de iluminación cunha gran pantalla de vídeo que exerce de fío condutor do concerto.