O pasado 8 de marzo, como parte das actividades conmemorativas do Día Internacional da Muller, o Centro Comercial Travesía organizou unha homenaxe á Asociación Érguete, a través dun mural realizado polo colectivo Expostas, para promover a igualdade de xénero e visibilizar o traballo das mulleres ao longo dos anos.

Nesta liña, varios colexios de Vigo, Alba, Alborada, Frián, García Barbón e Monterrey, uníronse á iniciativa e, coa guía dos seus docentes, os nenos e nenas plasmaron as súas propias visións sobre a igualdade e o papel fundamental da muller na sociedade. Estes murais, cargados de cor, creatividade e reflexión, son o resultado do traballo conxunto dos máis pequenos, quen tivo a oportunidade de expresar as súas ideas sobre o que significa para eles o 8M.

Desde o 14 de marzo e ata finais de mes, os murais atópanse expostos nun dos locais da planta alta do Centro Comercial Travesía, abertos a todo o público de 10:00 a 22:00 horas.

Desde o recinto comercial fan fincapé en que accións deste tipo, que contan coa participación activa dos colexios da zona ou a colaboración de artistas locais, poñen en valor o compromiso que a comunidade viguesa ten coa sensibilización de diversos temas para conseguir un mundo máis xusto para todos e todas. Ademais, eventos como este subliñan o poder da arte como vehículo de transformación social e como medio para involucrar ás novas xeracións na construción dun futuro máis inclusivo e respectuoso.