Vigo énchese de actividades marítimas coa celebración da segunda edición do Congreso do Mar

A segunda edición do Congreso do Mar acollerá, a próxima semana, numerosas mesas redondas con expertos no sector marítimo e unha manchea de actividades abertas a toda a cidadanía.

Vigo ultima os preparativos para converterse, desde o luns 8 ata o domingo 14 de xuño, no gran punto de encontro da economía azul coa celebración da segunda edición do Congreso do Mar. O evento, organizado polo Real Club Náutico de Vigo e Diesemm, reunirá a profesionais, empresas, institucións, deportistas, divulgadores e cidadanía ao redor dunha visión común: poñer en valor o mar como motor económico, social, cultural e ambiental. O núcleo congresual desenvolverase os días 10 e 11 de xuño nas instalacións do Real Club Náutico de Vigo, cun programa que abordará algúns dos principais retos e oportunidades da economía marítima a través de mesas redondas, entrevistas, relatorios e espazos de reflexión sobre turismo, sustentabilidade, innovación, deporte, industria e territorio.

A xornada inaugural do día 10, que se desenvolverá de 16:30 h. a 19:00 h., estará centrada en temáticas estratéxicas como o turismo, a sustentabilidade e o deporte náutico, poñendo o foco no potencial do mar como elemento de identidade. Entre os relatores, nomes salientables como o de Mariaje Torres, directora de Donostia Festak, o organismo do Concello de San Sebastián responsable da organización das históricas Regatas de la Bandera de la Concha; Maurici Carbó consultor organizador de Fitur Sport; Laura Moya, directora de Sailway; Susi Acuña, directora de Piratas de Nabia ou Fátima Pazos, directora do Hotel Faro Silleiro, quen achegará diferentes visións sobre o turismo náutico, o patrimonio marítimo e as novas experiencias vinculadas ao mar. Esta primeira xornada acollerá ademais o espazo ‘Voces del Océano’, concibido para dar protagonismo ás historias humanas que hai detrás da cultura marítima. Nel poderemos escoitar a Pilar Otero, presidenta de ANMUPESCA (Asociación Nacional de Mujeres da Pesca), así como divulgadores e creadores comprometidos coa conservación e a identidade marítima, como Jesús Souza, catedrático e codirector da Semana de Cine Submarino, ou Xaime Beiro, submarinista audiovisual e director do documental O Bosque do Carrumeiro.

A segunda xornada, o 11 de xuño, porá o foco na industria marítima e a economía azul. O primeiro bloque do día, ECM Innovación, dedicado a startups e proxectos emerxentes vinculados ao sector marítimo, dará paso ao coloquio ‘El Ecosistema del Mar en el Futuro’, unha conversación aberta que reunirá a todos os actores do ecosistema marítimo, co obxectivo de reflexionar sobre o futuro da economía azul en Galicia e fortalecer a colaboración entre todos eles. O programa do día complétase coa participación de Jorge Trigo, director de Recursos Humanos de CEAMSA, ou Manuel Aldao, director xeneral de Conservas Cerqueira; entre outros representantes de empresas referentes do sector, para abordar cuestións como a internacionalización, a
innovación, a sustentabilidade e o arraigamento territorial.

Entre as actividades máis salientables figura tamén un simulacro de Salvamento Marítimo na contorna do Real Club Náutico de Vigo, con rescate con helicóptero a pé de porto e que se poderá observar desde o paseo de As Avenidas. O Congreso do Mar manterá así mesmo a dimensión gastronómica cunha degustación de produtos
elaborados pola industria conserveira galega a mans do chef Juan Perret, do Restaurante Kero.
A asistencia ao Congreso é gratuíta e só require a inscrición previa a través da web oficial do certame: https://congresodelmar.rcnauticovigo.com/.

ACTIVIDADES ABERTAS A CIDADANÍA

Máis aló das xornadas congresuais, o evento deseñou unha ampla programación aberta ao público co obxectivo de fortalecer o vínculo entre a cidadanía e o mar e achegar a cultura marítima a persoas de todas as idades. Entre o 8 e o 11 de xuño, e grazas á colaboración de Piratas de Nabia, quen visite as Illas Cíes e Ons poderán participar en roteiros guiados gratuítos previa inscrición na web do evento. Ademais, o 12 de xuño celebraranse bautismos gratuítos en moto de auga para nenos e adultos da man de Cíes Jet e JetVigo.

A programación complétase coas actividades impulsadas pola Vigo Sailing Week do Real Club Náutico de Vigo, que inclúen bautismos de mar, talleres medioambientais, competicións de vela lixeira e Match Race, así como xornadas de limpeza de fondos mariños. Todas as propostas son gratuítas e requiren inscrición previa a través da páxina web oficial do Congreso.