Vigo convértese na capital mundial do deseño coa Bienal Francisco Mantecón

A Estación Marítima da cidade acolle unha exposición histórica que reúne 2.120 obras procedentes de 83 países, consolidando o certame de Terras Gauda como un referente internacional das artes gráficas.

Vigo reafirma a súa posición como capital do deseño gráfico coa apertura da exposición da Bienal Internacional de Cartelismo Terras Gauda – Concurso Francisco Mantecón. Nesta edición, que coincide co 25 aniversario do certamen, acadouse un fito histórico de participación ao recibir máis de 2.100 carteis de artistas chegados dos cinco continentes.

A mostra, que permanecerá aberta ao público na Estación Marítima ata o vindeiro 3 de xuño, permite contemplar a diversidade creativa de 83 nacións. Países como China, India, Estados Unidos, Islandia, Nixeria ou Australia están representados neste escaparate que serve de nexo de unión entre diferentes culturas a través da linguaxe universal do cartel. Desde a organización subliñase que a Bienal é a única do mundo que exhibe a totalidade das obras presentadas, reunindo nun mesmo espazo a novos talentos con deseñadores consagrados. Ademais de promover o talento artístico, o concurso contribúe a consolidar a Galicia como un destino de referencia no enoturismo e no deseño gráfico contemporáneo.

O fallo do xurado darase a coñecer o vindeiro venres 5 de xuño durante a entrega de premios, na que se repartirán 16.000 € entre os gañadores. Mentres tanto, os visitantes poden gozar deste percorrido pola arte visual en horario de mañá e tarde, de luns a domingo.