The Wild suspende a edición 2026 e denuncia abandono institucional

Publicado o por

O festival The Wild non celebrará edición en 2026. Así o confirma a súa organización a través dun comunicado no que sinala directamente á falta de apoio institucional, especialmente por parte do Concello de Vigo, como un dos factores clave detrás desta decisión.

Sesión de cine en The Wild | Paula Cermeño

O festival vigués The Wild acaba de colgar un comunicado na súa web anunciando que non celebrarán a edición de 2026. O festival celébrase desde 2017 no Parque Forestal de San Miguel de Oia e por el pasaron grupos como El Drogas, Ángel Stánich, Arizona Baby, Los Zigarros, Terbutalina, Dakidarría ou Moonshine Wagon. Ademais destaca por combinar a música con proxeccións de cine ao aire libre, probas deportivas e actividades familiares.

Segundo explica a Asociación The Wild, o parón responde a “motivos loxísticos, económicos e organizativos que impiden garantir os estándares de calidade que caracterizan ao evento”. Porén, o comunicado vai máis alá e apunta a unha cuestión estrutural: a escasa implicación das institucións locais nas iniciativas culturais da cidade. A organización asegura que a edición de 2025 xa se desenvolveu nun contexto de “apoio insuficiente”, algo que afectou directamente á viabilidade do festival.

Concerto de El Drogas en The Wild | Paula Cermeño

Esta situación, din, non é exclusiva do seu proxecto, senón que forma parte dun problema máis amplo que afecta ao conxunto do tecido cultural independente. Desde The Wild denuncian que os proxectos culturais pequenos e medianos non contan co respaldo necesario para garantir a súa continuidade, malia existir recursos públicos suficientes. Ao seu xuízo, estes non se distribúen de maneira equilibrada, o que acaba por limitar a diversidade e riqueza da oferta cultural.

A pesar do parón, a organización non fala de despedida. No propio comunicado confirman que xa están a traballar nun regreso para 2027, coa intención de recuperar o festival “con máis forza” e mantendo o nivel de calidade.

The following two tabs change content below.

Paula Cermeño

Licenciada en xornalismo pola USC, pero a súa principal ocupación é viaxar. Mentres aforra para dar a volta ao mundo, traballa como redactora e xestora cultural. Gústanlle os libros, o audiovisual, o teatro e o rock and roll, por iso é doado atopala en moitos dos saraos vigueses.

Publicaciones relacionadas:

  1. O Vigoseafest se suspende e outros festivais están no limbo
  2. A Orquestra Vigo 430 suspende o seu Ciclo de Outono
  3. Grupos en Loita denuncia que non se celebrase o festival Rock in Vigo prometido polo Concello
  4. O director vigués Pablo Fontenla denuncia que a TVG lle roubou a idea dun documental