Sierra Madre Taquería, a auténtica cociña de Monterrei estrea carta en Vigo

Publicado o por

En México, a Sierra Madre é unha importante cordilleira que atravesa o país de norte a sur, pero en Vigo é o nome dunha taquería con sabor a Monterrei, a capital do estado de Nuevo León. Sierra Madre Taquería estrea este mes de xullo unha nova carta con moito sabor a Mexico.

Fotos: Pablo Vázquez

A responsable de que Vigo teña esta conexión directa con Monterrei é Claudia, unha arquitecta que hai unha década cambiou a cidade do Rayados (que nunca deixou de seguir na distancia) pola do Celta. A súa motivación non foi empresarial, senón nostálxica: «Botaba de menos os tacos da miña terra, especialmente os de guiso do domingo, como Birria ou Barbacoa ». Claudia recorda con detalle como a súa familia maceraba e asaba partes da cara do porco durante horas para telos listos no almorzo e desfrutar así dos chamados tacos mañaneros. Malia que en Vigo aínda non logrou impoñer o costume de almorzar tacos de barbacoa ou de guiso (un reto que non descarta para o futuro), a súa proposta de xantar e cea é un exercicio de fidelidade absoluta ás súas raíces.

A oferta de Sierra Madre céntrase nos costumes gastronómicos do norte de México, unha das rexións máis prósperas de toda América Latina, que traslada a súa riqueza á mesa a través da calidade da súa gandería, tortillas excepcionais e salsas caseiras. Aló predomina a tortilla de fariña de trigo sobre a de millo. Para Claudia, a calidade deste soporte é innegociable. «Pásame coas tortillas o que aos galegos co pan, que nunca están conformes fóra da terra», explica a empresaria, casada cun porriñés. Aínda que non pode acudir a unha tortillería tradicional cada mañá, as de Sierra Madre proceden dun obradoiro artesán de Pontevedra, na busca desa textura e sabor caseiros.

A autenticidade está certificada polo selo Copil, un recoñecemento aos restaurantes que transmiten con rigor a cultura gastronómica mexicana en España. Claudia importa de México condimentos como o achiote, diversos tipos de chiles (xalapeños, anchos…) e o alquequenxe mexicano (tomatillo), esencial para a súa produción semanal de salsa verde, a menos picante das tres que pon en cada mesa e a máis demandada polos galegos. Tamén as bebidas son importadas: a auga de Xamaica, os Jarritos, as cervexas Modelo e Pacífico, o tequila…

Este mes de xullo Sierra Madre presenta unha nova carta, que comeza co que en México chaman botanear: petiscos para compartir mentres se conversa, entre os que destacan os totopos acompañados de guacamole ou os nachos ao pastor.

O núcleo da minuta son os tacos. Entre os clásicos figuran o de trompo (o Pastor do norte), a Campechana e a Gringa. Esta última é a favorita do público: carne de trompo en tortilla de fariña con queixo, chutney de mango, cebola e coandro. Pola contra, o padal de Claudia inclínase máis cara ao Pirata, un taco que define como «puro Monterrei» e que si é habitual nas ceas mexicanas, feito con arrachera (carne na grella), queixo, aguacate, cebola e coandro. Na nova carta aparece en formato XL, como tamén o de chourizo.

Na cociña, a maxia execútaa Davide, un chef italovenezolano que, segundo Claudia, interpreta as súas ideas «como se levase toda a vida en México». Xuntos manteñen unha filosofía clara: apostar pola comida de rúa con toques cosmopolitas. O pracer está ligado á mancha e leva inevitablemente a limpar as mans tras gozar de cada taco, cargado de guiso e salsas.

A oferta complétase con bebidas tradicionais preparadas desde cero, como a auga de Xamaica (infusión de flor de hibisco seca) ou a limoada de lima, ademais de micheladas e tequilas. E para o peche, a sobremesa mantén o ton caseiro: desde a Carlota de limón —unha receita tradicional sinxela con galleta e leite condensado— ata o pastel de elote (millo). Este último é unha lembranza directa das viaxes de Claudia co seu pai pola estrada nacional de Monterrei, un pan doce de textura húmida que a devolve á súa infancia.

Rúa de Afonso XIII, 12, baixo | @sierramadretaqueria | sierramadremx.com

The following two tabs change content below.

Paula Cermeño

Licenciada en xornalismo pola USC, pero a súa principal ocupación é viaxar. Mentres aforra para dar a volta ao mundo, traballa como redactora e xestora cultural. Gústanlle os libros, o audiovisual, o teatro e o rock and roll, por iso é doado atopala en moitos dos saraos vigueses.

Publicaciones relacionadas:

  1. Me vale madre, unha taquería da nosa terra
  2. Catro establecementos vigueses poñen a súa carta a metade de prezo para promover a volta aos restaurantes
  3. Probamos a carta de outono de Alium
  4. Máis hamburguesas de autor e opcións veganas na nova carta de La Urbana