Seis actividades imprescindibles da Feira do Libro
Do 1 e o 7 de xullo a Feira do Libro volve á Praza de Compostela de Vigo, organizada pola Federación de Librarías de Galicia. O programa completo pode consultarse aquí, pero poñévolo doado con esta guía dos esenciais para desfrutar da semana grande da literatura en Vigo.
A Feira do Libro consolídase na praza de Compostela, logo de anos de peregrinaxe polo Calvario e a Rúa do Príncipe. Ao longo de sete días, editoras, librarías e autores de toda Galicia ofrecerán presentacións, obradoiros, sinaturas e espectáculos para todas as idades. Este 2025 chega con novidades: 21 casetas, catro máis ca o ano pasado, e un cartel ilustrado pola artista María Lapido, que plasma o lema da feira: Onde florecen os libros.
Entre a extensa programación, escollemos cinco actividades destacadas:
1 – Pregón de apertura con Nuria Vil
A Feira do Libro de Vigo arrinca oficialmente o martes 1 de xullo ás 12:30 h, coa lectura do pregón na Praza de Compostela, a cargo da poeta e performer Nuria Vil. Natural de Vigo, Vil é unha creadora multidisciplinar que traballa a poesía, a arte escénica e a performance, cun estilo propio marcado polas mensaxes sociais e a experimentación co corpo e o son.
2 – Actividades infantís: contos e teatro para a rapazada
A programación infantil ocupa un espazo importante na feira. O martes 1 ás 18:15 h as familias gozarán do espectáculo interactivo Os Xogos do Paporrubio. O xoves 3 terá lugar o concerto-espectáculo C@nto contigo, de Paco Nogueiras, no que o artista repasa as mellores cancións dos deus tres discos. O venres á mesma hora o grupo Pedras de Cartón representará a obra Carapuchiña vermella. Ademais, haberá dous contacontos e obradoiros de reciclaxe.
3 – Obradoiros creativos para todos os públicos
Os obradoiros son outra das propostas destacadas desta edición, pensados para fomentar a participación dos asistentes. O mércores 2 de xullo ás 18:15 h celébrase Follas de papel, unha actividade de marcapáxinas con papel reciclado. O sábado 5 de xullo, ás 18:45 h, chega Unha viaxe con Rosalía, un obradoiro de iniciación ao cómic impartido por Paula Mayor.
4 – Roteiro literario: O Vigo de Leo Caldas
O sábado 5 de xullo ás 12:00 h, terá lugar unha das actividades estrela desta edición: o roteiro literario polos escenarios das novelas de Domingo Villar, guiado por Pedro Feijoo e Guada Guerra. A proposta percorre os espazos da cidade polos que transitou o inspector Leo Caldas, protagonista das novelas do autor vigués falecido en 2022 e que conta cunha estatua na propia Alameda. As prazas son limitadas e a saída é desde a carpa da feira. Continuando coa lembranza de Domingo Villar, o domingo 6 de xullo ás 12:00 h, celebrarase unha lectura pública das súas obras na carpa principal.
5 – Encontros con escritores
Todos os días hai conversas con autores e presentacións de libros. Citamos algunhas delas. O mércores 2 de xullo ás 19:45 h, o editor e ensaísta Manuel Bragado presenta Vigo na liña de tempo, nunha conversa con Xoán Carlos Gallego Abad, presidente do Instituto de Estudos Vigueses.
O xoves 3 de xullo, ás 18:45 h, Diego Giráldez presenta As obras póstumas, acompañado pola escritora Ledicia Costas. Ese mesmo día, ás 20:00 h, dentro do ciclo Conversas Follas Novas, Tamara Novoa, directora de A Movida, conversa con Sandra Lodi, gañadora do premio ao Mellor Libro Ilustrado por Papóns.
O domingo 6 de xullo ás 19:00 h, será a quenda de Pedro Feijoo, que presenta Onde nacen as bestas acompañado da xornalista Guada Guerra.
6 – Poesía en escena
A poesía está representada por tres artistas afincados en Vigo. O martes 1 de xullo ás 19:45 h, a poeta Branca Trigo ofrece Mandrágora. Ritual poético. O domingo 6 de xullo ás 13:00 h, chega Man a man, un espectáculo poético a dúas voces protagonizado por Samuel Merino e Silvia Penas, dúas das grandes voces da poesía oral galega contemporánea.
Paula Cermeño
Últimos posts de Paula Cermeño (ver todos)
- El Perro Verde, cociña viaxeira no xardín - 9 Xullo, 2025
- A Póla, cultura e tardeo - 9 Xullo, 2025
- A música celta toma Ortigueira encabezada por Gwendal, Milladoiro e La Bottine Souriante - 4 Xullo, 2025
- Fai Bistés: tradición á grella no Casco Vello - 2 Xullo, 2025
- Seis actividades imprescindibles da Feira do Libro - 27 Xuño, 2025