Ribadavia mobilízase para salvar o Festival Arteficial tras dúas décadas de historia
A organización do Festival Arteficial pon en marcha unha campaña de micromecenado baixo a fórmula de ‘todo ou nada’ co obxectivo de acadar os fondos mínimos que garantan a vixésima edición deste evento referente da autoxestión no rural galego.
O Festival Arteficial de Ribadavia, nado en 2006 como unha ‘rebelión cultural’ nunha vila declarada Ben de Interese Cultural, afronta un dos seus momentos máis críticos xusto cando se dispón a celebrar o seu vixésimo aniversario. A Asociación Cultural Arteficial, entidade sen ánimo de lucro formada por veciñanza do Ribeiro , anunciou a apertura dunha campaña de micromecenado na plataforma Goteo para evitar a desaparición do proxecto. O reto consiste en conseguir un mínimo de 3.000 € nun prazo de 40 días; de non acadarse esta cifra, a organización non poderá sufragar a infraestrutura básica e o festival non poderá desenvolverse.
A diferenza doutros eventos convencionais, a singularidade do Arteficial radica nun modelo que transcende as datas festivas, impulsando actividades interxeracionais durante todo o ano para dinamizar o territorio do Ribeiro. A súa programación combina música emerxente local con propostas estatais e internacionais nun ambiente de convivencia.
O festival destaca polos seus espazos singulares, xa que a organización dispón de tres escenarios simultáneos que inclúen áreas ao aire libre para a convivencia entre xeracións e o interior da igrexa da Madalena para concertos acústicos. En canto ao compromiso social e á equidade, o evento promove a igualdade mediante protocolos contra a violencia machista e o apoio ao colectivo LGTBI+ , ademais de colaborar coa Cruz Vermella do Ribeiro a través dunha entrada solidaria baseada na doazón de alimentos. Finalmente, no ámbito da sustentabilidade, o festival está integrado no Pacto de Cultura Sustentable desde 2022 e conta cunha ‘patrulla verde’ para supervisar o impacto ambiental xunto a un mercado que ofrece artesanía e sementes.
Ao longo de 19 edicións, os escenarios de Ribadavia acolleron bandas da escena galega e portuguesa, como Bala ou Fillas de Casandra, xunto a artistas de México, Francia ou Gambia. Este traballo está sostido por un equipo voluntario con case vinte anos de experiencia, estruturado en áreas profesionais que van dende a loxística ata o deseño.
Con esta campaña de apoio, o Arteficial non só busca salvar a cita de 2026, senón garantir a supervivencia dun espazo cultural accesible e con identidade propia que se dirixe tanto á veciñanza local como a quen valora os pequenos formatos alleos aos circuítos comerciais.