CAMELIAS MASCOTAS

Os taxis achegan o Nadal ás residencias da cidade

Publicado o por

A Cooperativa Central Radio Taxi volveu a dar onte unha lección do verdadeiro espírito natalicio, recollendo a todas as persoas das residencias que o solicitaron para achegalas ao centro da cidade para que gocen da iluminación e da decoración. Sobre medio centenar de taxis, incluídos os vehículos adaptados para persoas con discapacidade,  recolleron de maneira gratuíta e altruísta a case 200 anciáns de todas as residencias das cidade.

  • José Antonio, Alfredo, Pedro e Alejandro fronte a árbore | Pablo V.
  • Pedro e Alejandro posando fronte a Papa Noel | Pablo V.
  • Os tres residentes de Santa Marta na Porta do Sol | Pablo V.
  • Pedro gozando do espectáculo lumínico da árbore | Pablo V.
  • José Antonio xunto a unha amiga da residencia | Pablo V.
  • O alcalde sacando unha foto cunhas señoras | Pablo V.
  • Ningún dos tres quixo perderse a nora xigante | Pablo V.
  • Alejandro foi o que máis gozou da iluminación | Pablo V.

Alfredo foi un dos moitos taxistas que onte se achegaron ás diferentes residencias da cidade para darlles unha alegría aos seus inquilinos. El encargouse de traer desde a Residencia Santa Marta, en Alcabre, a José Antonio, toledano afincado en Vigo desde hai máis de 50 anos; a Pedro, de Murcia; e a Alejandro, vigués. Con eles recorrimos as rúas do centro desde a Porta do Sol ata a nora.

REVISTA NOVEMBRO

José Antonio, o máis faladeiro de todos, contaba orgulloso que tras moito insisitirlle ao alcalde, conseguira que puxeran unha liña de bus á residencia. “Xa verás como me recoñece”, comentaba xusto antes de darlle a man a Caballero. Os outros dous parecían máis interesados nas luces, especialmente Alejandro coa xigantesca nora do Areal.

Agás algún chuvasco puntual cara o final da tarde, a chuvia deu tregua para que decenas de anciáns gozaran dun agradable paseo polo centro e gozaran da iluminación natalicia. Antes das oito os nosos tres amigos subiron de novo ao taxi de Alfredo, que os levou de volta a Santa Marta para tomar a última cea anterior a Noiteboa.

O taxista, que xa leva tres anos participando nesta actividade, mostrou a súa satisfacción polo ben que saíran as cousas e pola ledicia dos homes aos que levou e trouxo: “É algo súper gratificante, un deses casos nos que é moito mellor dar que recibir”. Ademais, quixo facer unha mención especial ás súas compañeiras, xa que “houbo moitas mulleres taxistas cun gran amor polo detalle que se disfrazaron, transmitindo un moi bo ambiente”.

The following two tabs change content below.
My LinkedIn profileMy Vimeo channel

Pablo Vázquez

Graduado en Comunicación Audiovisual pola Universidade de Vigo, é un apaixoado do cine, da música e da fotografía. É director dos documentais 'O profesor', 'The Death: el reencuentro' e 'Cuna de músicos', ademais de coautor do libro 'Son da cidade', o que lle fixo coñecer aínda máis a escena musical viguesa. Ten traballado con distintos grupos e salas da cidade, ademais de participar nos últimos anos como Xurado Novo nos festivais de cine de San Sebastián e Novos Cinemas.