Os concertos de Castrelos teñen un custo de arredor de tres millóns e medio de euros
Salvo sorpresa de última hora, o programa de Vigo en Festas para Castrelos deste verán xa está pechado. O cartel inclúe doce xornadas de actuacións musicais, sendo tres dela óperas ou teatro musical e outra o tradicional concerto da Coral Casbalanca.
Este xoves 2 de xullo arranca a programación de verán de Castrelos co concerto da mítica banda de rock Deep Purple. Os británicos cobrarán o segundo caché máis alto de Vigo en Festas (574.084 euros, IVE incluído), só superados por Chayanne, que se embolsará 853.050 euros polo seu concerto do día 30 de xullo. Deste xeito, o portorriqueño ascende ao podio dos concertos máis caros da historia de Castrelos, acompañado por David Guetta e Aitana. The Corrs e Viva Suecia, ambos con cachés de 459.800 euros, completan a zona alta.
No lado contrario atopamos á Coral Casablanca (46.585 euros) e ás óperas Carmen (67.797 euros) e Nabuco (97.284 euros). Polo momento non se fixo pública a cantidade investida no triple concerto galego de Fillas de Cassandra, The Rapants e Eladio y los Seres Queridos, realizado en conxunto coa multinacional FNAC. O máis probable é que non supere os 100.000 euros, polo que o custo total da programación musical deste verán en Castrelos non chegaría aos tres millóns e medio de euros, unha cifra moi semellante á dos dous anos anteriores.
Unha das novidades desta edición é a maior presenza de artistas galegos en comparación con outros anos: Fillas de Cassandra, The Rapants, Eladio y los Seres Queridos, Iván Ferreiro e a Coral Casablanca. Tamén o aumento de óperas ou música teatral, vendo o bo funcionamento (e o baixo custo) que tiveron o ano pasado.
PROGRAMA
- 2 de xullo – Deep Purple
- 16 de xullo – Molotov
- 18 de xullo – Coral Casablanca
- 24 de xullo – Ópera Carmen
- 30 de xullo – Chayanne
- 1 de agosto – Noite de zarzuela
- 7 de agosto – Abraham Mateo
- 9 de agosto – Ópera Nabucco
- 11 de agosto – The Corrs
- 14 de agosto – Viva Suecia
- 15 de agosto – Iván Ferreiro
- 16 de agosto – Fillas de Cassandra, The Rapants e Eladio y los Seres Queridos
Pablo Vázquez
Últimos posts de Pablo Vázquez (ver todos)
- Os concertos de Castrelos teñen un custo de arredor de tres millóns e medio de euros - 30 Xuño, 2026
- Do bar ao mundial: a evolución imparable do fútbol gaélico en Galicia - 29 Xuño, 2026
- O Vigo de Miguel Costas - 29 Xuño, 2026
- A Asociación As da Industria despídese da organización de eventos por mor das “trabas burocráticas do Concello de Vigo” - 29 Xuño, 2026
- O labirinto administrativo de Vigo: por que é tan difícil organizar un evento cultural no espazo público - 4 Xuño, 2026