O Río Verbena Fest pecha o cartel da súa quinta edición e desvela a distribución por días
O festival celebrarase os vindeiros 21 e 22 de agosto no exterior do Recinto Feiral de Pontevedra e contará con artistas como Love of Lesbian, Siloé, Carlos Ares, León Benavente ou La La Love You.
O Río Verbena Fest completou o cartel da súa quinta edición e deu a coñecer a distribución por días dos artistas que actuarán en Pontevedra os próximos 21 e 22 de agosto. O festival, que volverá celebrarse no exterior do Recinto Feiral, suma novos nomes a unha programación que reafirma o seu crecemento como unha das grandes citas musicais da cidade.
Ás incorporacións xa anunciadas anteriormente —Love of Lesbian, Siloé, La La Love You, Carlos Ares, Sidonie, Sanguijuelas del Guadiana, Yoly Saa, Luis Fercán, Cora, Los Acebos ou Señora DJ— engádense agora León Benavente, Sarria, Apolo 18, French Riviera, Müntrails e Sergio El Indio DJ. Con estas novas confirmacións, o festival reforza unha proposta que combina bandas consolidadas do panorama nacional con artistas emerxentes e proxectos ligados á nova escena independente.
Un dos grandes atractivos desta edición será a presenza de Love of Lesbian, que chegarán a Pontevedra nun dos últimos concertos antes da pausa indefinida anunciada recentemente pola banda. Pola súa banda, León Benavente levará ao escenario o seu potente directo de rock alternativo, mentres que o malagueño Sarria achegará o seu son de raíces setenteiras e espírito retrofuturista. Müntrails representará a vertente máis atmosférica do post-rock galego e Sergio El Indio DJ volverá poñer o toque máis festivo desde a cabina.
O cartel complétase ademais con Apolo 18 e French Riviera, dous proxectos integrados no circuíto da Fundación Paideia Galicia, centrado no impulso e acompañamento de novos talentos musicais en proceso de crecemento e consolidación.
Distribución por días
Venres 21 de agosto: Siloé, La La Love You, Sidonie, Luis Fercán, Sarria, Cora, Müntrails, Apolo 18 e Señora DJ.
Sábado 22 de agosto: Love of Lesbian, Carlos Ares, Sanguijuelas del Guadiana, León Benavente, Yoly Saa, Los Acebos, French Riviera e Sergio El Indio DJ.
Entradas diarias desde este mércores
O festival tamén anunciou que as entradas diarias sairán á venda o mércores 19 de maio, ás 12.00 horas, a través da web oficial do evento, cun cupo limitado e prezos a partir de 39 euros.