REVISTA MARZO

O Mar de Vigo celebra San Valentín con descontos en dez actuacións

Desde hoxe e ata o 14 de febreiro o Auditorio Mar de Vigo ofrece un 50% de desconto na segunda entrada para dez dos espectáculos que ten programados esta tempada, como os concertos de Mikel Erentxun e Quique González, ou a primeira
función do musical ‘Ghost’ . As entradas deben adquirirse a través da plataforma teuticket.

Quique González

O Auditorio Mar de Vigo comeza hoxe luns e ata o 14 de febreiro unha gran campaña de descontos con motivo do día de San Valentín. Esta oferta consiste nun desconto do 50% na segunda entrada, para poder gozar en parella de ata dez espectáculos da súa programación. As entradas deben adquirirse a través da plataforma teuticket.

Estes eventos forman parte dos programados ata principios de abril, entre os que podemos atopar desde ballet, música, humor ou ópera. Durante case quince días, a compra dunha segunda entrada terá unha rebaixa do 50% e este desconto está activado válido para o ballet de ‘La Bella Durmiente’ este sábado 5 de febreiro, os concertos de Nacho Vegas o 12 de febreiro, Mikel Erentxun o 25 de febreiro, Albert Pla o 12 de marzo, Quique González o 25 de marzo e Miss Caffeina o 2 de abril, a primeira sesión do musical de ‘Ghost’, protagonizada por Bustamante, o 3 de marzo ás 20.30 horas, o tributo a Queen, Remember Queen o 11 de marzo, a primeira función do show humorístico de Carlos Latre o 18 de marzo, ou a gran ópera de G. Verdi,Aida’, o vindeiro 3 de abril.

Entre as propostas está o ballet de La Bella Durmiente este sábado 5 de febreiro. As aclamadas figuras do Royal Russian Ballet chegan aos escenarios para traer unha estupenda produción do ballet clásico que entusiasmará a toda a familia. Esta xenial creación de Tchaikovsky, combínase cunha fermosa coreografía para conformar unha produción que conquistou ao público en todo o mundo. Como están facendo os numerosos artistas que presentarán os seus novos discos no Auditorio Mar de Vigo estes meses.

‘Mundos inmóviles derrumbándose’ é o título do álbum que Nacho Vegas presentará en Vigo o 12 de febreiro, despois de colgar o cartel de entradas esgotadas esta primeira fin de semana, e na que estará ben arroupado sobre o escenario por unha nova e sólida banda. O 25 de febreiro é a nova data para o concerto de Mikel Erentxun, un artista volve con toda a súa banda, en eléctrico, para darlle unha nova vida a unha selección de cancións míticas, que inclúe este proxecto especial, ‘Amigos de Guardia’. Albert Pla regresa o Galicia o 12 de marzo con ‘Miedo 2.0’, onde o artista de Sabadell propón unha reflexión sobre como se convive “con novos medos, inimaxinables ata o de agora”. Aposta por ”superar o medo”. Neste proxecto, Pla asume a concepción e interpretación e está acompañado por Pepe Miravete na dirección. Ademais, lidera a parte musical xunto a Raül Refree.

Banner A Movidiña

Por outra banda, Quique González, presentará ‘Sur en el valle’ o 25 de marzo no Auditorio Mar de Vigo. Un traballo cun son orgánico, directo e unha enerxía contida no que busca novas paisaxes sonoras e outorga maior protagonismo a instrumentos acústicos como o contrabaixo e a guitarra clásica. Xa en abril, o día 2, Miss Caffeina chegan a Vigo co seu novo traballo, ‘El año del Tigre’, co que a banda se lanza á estrada, nunha xira sen precedentes, para mostrarlle ao mundo as garras presentando en directo as cancións deste novo álbum.

O musical de ‘Ghost’, o espectáculo, que recibiu o Premio Broadway World Spain ao Mellor Music chegará en marzo ao Mar de Vigo con seis funcións. O desconto da segunda entrada a metade de prezo poderá utilizarse na primeira das funcións na que ademais, actuará Bustamante no papel de Sam, a do 3 de marzo ás 20.30 horas. ‘Remember Queen’, a mellor homenaxe a Queen do mundo, chega o 11 de marzo en formato musical, cun excelente percorrido polas súas cancións e con Piero Venery ó frente, considerado o mellor dobre de Freddie Mercury do mundo. A primeira das sesións de ​​One Man Show, o novo espectáculo de Carlos Latre, o 18 de marzo, tamén contará con ese desconto. Unha velada na que fará un repaso a toda a actualidade do país. A política, sociedade, cultura, deporte, televisión, modas, tendencias, Internet, a pandemia e a Covid.

E o 3 de abril, a compañía de Ópera “LGAM” (Leonor Gago Artist Management) en colaboración coa Ópera Nacional de Moldavia presentan: ‘Aida’ de G. Verdi, Ópera en 4 actos. Máis de 70 artistas baixo a dirección escénica de Javier Agullo, con trece artistas solitas invitados, coa soprano Helena Gallardo e o tenor Goirgi Meladze á fronte.