O Festival Sinerxias 430 conecta séculos de música e culturas na súa segunda edición
A Orquestra Vigo 430 presenta a segunda edición do Festival Internacional de Música de Cámara Sinerxias 430, que se desenvolverá entre setembro e novembro en diferentes espazos de Vigo. Baixo o lema “Mapas invisibles”, o ciclo propón descubrir os vínculos que unen compositores, repertorios, épocas e culturas, aparentemente, afastadas a través de catro concertos, dúas xornadas de clases maxistrais e unha mesa redonda.
Ademais de actuacións, o festival constrúe un relato arredor da música no que a interpretación, a formación e a reflexión toman protagonismo. A programación reunirá intérpretes internacionais, novos talentos e músicos do Ensemble Vigo 430, con propostas que viaxan desde o Barroco europeo ata as conexións musicais entre España e América Latina.
Clases maxistrais gratuítas
A programación comezará os días 24 e 25 de setembro no Conservatorio Profesional de Vigo, onde a pianista Siqian Li impartirá dúas xornadas de clases maxistrais. As sesións estarán financiadas polo festival e serán gratuítas para o alumnado do centro, co obxectivo de crear pontes entre intérpretes internacionais e as novas xeracións.
Programa do II Festival Sinerxias 430
24 e 25 de setembro — Clases maxistrais de Siqian Li
A pianista traballará co alumnado do Conservatorio Profesional de Vigo en dúas xornadas formativas de acceso gratuíto para os estudantes do centro.
27 de setembro — O vals das almas secretas
O primeiro concerto celebrarase no Auditorio Afundación e conectará a obra de Jenő Vecsey, Maurice Ravel, Claude Debussy, Clara Schumann e Johannes Brahms. Participarán a violinista Catherina Lee, a pianista Siqian Li e o Ensemble Vigo 430.
29 de outubro — Canon e esquecemento: quen decide o que escoitamos?
O Café Vitruvia acollerá unha mesa redonda que reflexionará sobre a construción do canon musical e as razóns polas que determinados compositores caen no esquecemento. O encontro partirá da figura do francés Albéric Magnard.
31 de outubro — Proxecto Magnard
A reivindicación da obra de Albéric Magnard continuará neste concerto, que porá o seu legado en diálogo con composicións de Jean Françaix, Camille Saint-Saëns e Francis Poulenc. O programa estará centrado no repertorio francés para vento madeira e piano.
14 de novembro — Batallas, folías e paixóns
A Basílica de Santa María converterase no escenario dunha viaxe polo primeiro Barroco italiano e centroeuropeo. A frautista Manuela Mitterer e o Ensemble Barroco Vigo 430 interpretarán obras de Bertali, Castello, Falconieri, Pandolfi Mealli, Schmelzer, Caldara e Vivaldi.
28 de novembro — De amor e fronteira
O festival despedirase no Auditorio Afundación cun concerto que tenderá pontes entre España e América Latina a través das músicas de Turina, Falla, Guastavino, Violeta Parra, Ariel Ramírez e Astor Piazzolla. Participarán Anuschka Pedano á viola, María Pedano á voz, Illia Fialko ao piano e o Ensemble Vigo 430.
*As entradas estarán dispoñibles a través de Ataquilla, mentres que a información completa poderá consultarse na páxina da Orquestra Vigo 430.