O centro histórico volverá a acoller a proba máis emblemática do Marisquiño
O MTB Downtown de O Marisquiño 2026 converterá o Casco Vello de Vigo nun dos circuítos de descenso urbano máis singulares do mundo. A proba partirá da fortaleza do Castro, o punto máis alto do centro urbano, e finalizará no contorno portuario, cun percorrido dun quilómetro e 135 metros de desnivel.
O Marisquiño 2026 presentou este martes, na terraza do centro de lecer A Laxe, o regreso dunha das probas máis espectaculares e agardadas do festival: o MTB Downtown. A competición celebrarase o sábado 8 de agosto e volverá converter o centro histórico de Vigo nun circuíto de descenso urbano en Mountain Bike, cun percorrido que parte da fortaleza do Castro, serpentea polo Casco Vello e finaliza no contorno portuario.
O MTB Downtown consolidouse como unha das sinais de identidade de O Marisquiño 2026 e unha das citas máis singulares do calendario internacional. Nunha disciplina tradicionalmente ligada á montaña, a proba viguesa traslada a adrenalina do downhill ao corazón histórico da cidade e converte a súa topografía e patrimonio nun elemento esencial da competición.
Como en cada edición, reunirá en Vigo algúns dos mellores especialistas nacionais e internacionais desta disciplina, en categorías masculina e feminina. O formato será individual e contrarreloxo, con roldas de adestramento, clasificación e final.
Do Castro á Laxe: un descenso a través da historia de Vigo
O MTB Downtown 2026 partirá do entorno da fortaleza do Castro e descenderá por un trazado que atravesa o Monumento aos Galeóns de Rande, a Praza do Rei, o Paseo de Alfonso XII e o miradoiro da Oliveira. A continuación, o percorrido adentrarase no Casco Vello pola rúa Elduayen e descenderá cara ás rúas Caracol e Méndez Núñez, pasando pola Praza da Igrexa e a Praza da Pedra. No tramo final, os riders cruzarán a pasarela que conecta o Casco Vello coas terrazas superiores de A Laxe, ata chegar á liña de meta no contorno marítimo.
O trazado, dun quilómetro e 135 metros de desnivel, combina arquitectura urbana e estruturas específicas para a competición, con escaleiras, xiros rápidos e módulos de salto. As zonas recomendadas para o público inclúen o Monumento aos Galeóns de Rande, a Praza do Rei, a rúa Elduayen (miradoiro da Oliveira), a Praza da Colexiata e a liña de meta en A Laxe.
