O Celta busca a camiseta que Madonna vestiu no concerto en Vigo de 1990

Publicado o por

O RC Celta de Vigo vén de activar un chamamento público para localizar a camiseta que Madonna vestiu no seu concerto de Balaídos o 29 de xullo de 1990 e cuxo rastro se perdeu tras aquela noite. Despois de anos de procura discreta sen éxito, o club pide agora axuda á cidadanía e á propia Madonna para atopala.

Foto: Vitín de las Heras

O 29 de xullo de 1990, Vigo viviu un dos seus momentos culturais máis inesquecibles: o estadio de Balaídos converteuse nun escenario musical internacional cando a artista estadounidense Madonna incluíu a cidade na súa xira europea Blond Ambition. Naquel espectáculo multitudinario, a raíña do pop sorprendeu ao público ao enfundarse a camiseta do RC Celta de Vigo co dorsal 5 de Espinosa á espalda, nunha imaxe captada polo fotógrafo vigués Víctor de las Heras que perdura na memoria dos vigueses ata hoxe.

O rastro da prenda pérdese despois do concerto. Segundo o propio club, levaban anos intentando localizala de maneira discreta, pero a investigación estancouse, polo que agora piden a colaboración cidadá para atopala. Queren “recuperar esa camiseta única e irrepetible, que forma parte do noso patrimonio emocional” para incorporala ao seu arquivo histórico. Con ese obxectivo, pídese a toda a cidadanía que achegue calquera información sobre o posible paradero a través dun cuestionario na súa web.

Nunha carta aberta á cantante estadounidense publicada nas redes, a presidenta Marián Mouriño anuncia que este venres 6, previo á celebración do partido contra o Real Madrid, realizarase no estadio un chamamento a Madonna para preguntarlle “Aínda ates?”.

The following two tabs change content below.

Paula Cermeño

Licenciada en xornalismo pola USC, pero a súa principal ocupación é viaxar. Mentres aforra para dar a volta ao mundo, traballa como redactora e xestora cultural. Gústanlle os libros, o audiovisual, o teatro e o rock and roll, por iso é doado atopala en moitos dos saraos vigueses.

Publicaciones relacionadas:

  1. Yago Alcover (Mujeres): “Recomendaría á xente que traia tapóns e unha camiseta limpa, porque vai ser moi tolo!”
  2. Loce unha camiseta de Fillos do mar sen gastar un peso
  3. Vigo Histórico busca nome para unha céntrica praza de Vigo
  4. Su Garrido Pombo busca mecenas para que Traspielas se converta en disco