bannerRevistaOnline

O alumnado de Pin Factory prepara un desfile en Vialia

Como cada curso, a escola de deseño e moda Pin Factory prepara un desfile onde poder amosar con orgullo as pezas creadas polo seu alumnado. Este ano celebrarase, por vez primeira, no Centro Comercial Vialia, un espazo que promete estar ateigado de xente na data escollida para a pasarela, o xoves 22 de decembro ás 19:30.

Alumnos de segundo curso preparando as súas coleccións | P. Vázquez

Unha ducia de alumnos e alumnas están diante do ordenador co Photoshop aberto, elaborando colaxes inspirados nas súas propias creacións textís. Desde a cristaleira do local, situado na rúa do Padre Ramón María Aller, obsérvase o perfil prateado do Centro Comercial Vialia, onde en mes e medio as súas prendas estarán desfilando sobre a pasarela da zona Vigo Exporta. É a primeira vez que esta actividade se realiza nesta localización, e con este cambio a escola busca “que o traballo dos alumnos chegue máis xente e non se quede só nun evento familiar”, explica o profesor Guillermo Gómez.

Os alumnos de segundo curso crearán unha colección de catro pezas de temática libre, mentres que os de primeiro participarán cun só modelo seguindo o concepto de Metamorfose: “Queremos que a roupa sexa como un elemento orgánico que transforma á persoa, xogando cos volumes, formas, texturas… Non buscamos embelecer o corpo, se non crear novas formas que o distorsionen”, indica Gómez. En definitiva, fuxir da “humanidade” a través destas orixinais pezas textís.

Banner A Movidiña

A escasos metros da aula de ordenadores, no obradoiro de confección, a rapazada de segundo curso está a traballar nas súas prendas. Abundan os vestidos, pero cada un é radicalmente distinto ao do lado. Ao fondo da sala vemos a Míchel Silva medindo coa cinta métrica a súa peza, un vestido longo dourado. Conta que se inspirou na evolución da ave fénix, e cada estilismo representa as etapas da vida (e morte) deste ser mitolóxico: nacemento, vida plena, morte e resurrección. Este último, dun dourado intenso, é un vestido de festa de corte clásico, inspirado polo estilo parisino dos anos vinte do pasado século e polo lume da resurrección. Pola súa banda, Ana Lorenzo atopou no ciclo lunar a esencia da súa colección. Vestidos de estilo clásico e renacentista feitos a base de algodón, la, tule e brillantes. A alumna móstrase emocionada polo desfile, na que será a primera vez que mostre ao público unha colección propia.

O desfile do xoves 22 de decembro, que levará o nome de Sinergias, constará de dúas partes. A primeira estará protagonizada polas prendas de Moda Re-, unha iniciativa social impulsada pola Diocesana de Caritas Tui-Vigo que aposta por la reutilización de roupa e complementos en bo estado, a través da creación de emprego social, contratando a persoas que están en risco de exclusión social. A recaudación da venda destas prendas vai destinada integramente aos labores benéficos de Cáritas. O estilismo que lucirán os modelos correrá a cargo do alumnado de Pin Factoy, que poderán combinar de formas arriscadas, rechamantes e explosivas as prendas doadas por particulares e empresas. Acto seguido desfilarán as prendas do alumnado de primeiro e segundo. Pezas feitas de xeito artesanal, do mesmo modo que a alta costura.

Pin Factory é un centro de formación específica en estudos de Deseño de Moda e en todas as disciplinas que conforman o perfil profesional, técnico e creativo, máis demandado polas empresas do sector Téxtil e Moda. Unha aventura iniciada hai tres décadas como escola de corte e confección por Beatriz Novas, actual directora do centro. Mediante o desfile Sinergias pretende tender pontes con outras empresas e espazos da cidade, como Moda Re- e Vialia. Este último, desde a súa apertura en setembro de 2021, demostrou a súa polivalencia acollendo nas súas instalacións todo tipo de actividades: probas deportivas, concertos, teatro, actividades infantís, batallas de rap, danza, etc.

The following two tabs change content below.

Pablo Vázquez

Graduado en Comunicación Audiovisual pola Universidade de Vigo, é un apaixoado do cine, da música e da fotografía. É director dos documentais 'O profesor', 'The Death: el reencuentro' e 'Cuna de músicos', ademais de coautor do libro 'Son da cidade', o que lle fixo coñecer aínda máis a escena musical viguesa. Ten traballado con distintos grupos e salas da cidade, ademais de participar nos últimos anos como Xurado Novo nos festivais de cine de San Sebastián e Novos Cinemas.
X