Novidades musicais viguesas para rematar o ano: Iván Ferreiro, Marta Vidal, Noar ou Vimbio

Remata o 2025, un ano que nos trouxo moita e moi boa música de artistas locais. Esta última entrega do ano trae desde artistas consolidados a proxectos emerxentes de estilos moi variados.

NOAR

Primeiro tema do novo proxecto de Noar, desta vez en formato de cuarteto con Rubén Fernández á voz, Iago Marta á guitarra, Yudit Almeida ao contrabaixo e Zalo Rodríguez ao sintetizador.

REBELIOM DO INFRAMUNDO

Rebeliom do Inframundo afronta 2026 cunha forza incontestable… e presentado xa o primeiro adianto do seu novo traballo. ‘Sube’ é é un berro colectivo: a canalización en rima dun malestar social crecente. A peza articula unha crítica directa ás desigualdades e convértese nun exercicio de expresión lírica dun sector profundamente descontento e afogado por un capitalismo cada vez máis feroz. Un contexto que, lonxe de aliviar tensións, alimenta o avance dunha ultradereita conservadora cada vez máis presente no panorama actual.

MIGUEL MOLDES

A finais de novembro vía a luz Fairgorund Ballads, o primeiro disco en solitario de Miguel Moldes, músico orixinario de Sanxenxo que reside en Vigo. Un traballo breve pero cheo de grandes cancións que oscilan entre o folk norteamericano, o gypsy jazz e o R&B.

MARTA VIDAL

Tras a publicación de ‘supertramp 2009’, primeira mostra do universo sonoro do álbum, a cantante e compositora viguesa Marta Vidal continúa desvelando as pezas dun proxecto que combina sensibilidade emocional, sofisticación estética e un claro pulso bailable. ‘extraordinaria’ é unha canción de pop alternativo que bebe do dance pop e do funk pop, escrita e composta pola propia Marta e producida por Sergio M. Puga. O tema mestura beats filtrados de aire DJ con percusión latina inspirada en patróns de merengue, creando unha atmosfera vibrante, cálida e luminosa.

IVÁN FERREIRO

Pasaron 20 anos dende que Iván Ferreiro inaugurou a súa etapa en solitario con esta canción, hoxe un himno pop deste país. Por iso, agora que recupera os clásicos do seu repertorio, volveron gravar este tema cun son actualizado e coa vontade de levalo de novo ao máis alto.

NILLO NÁNDEZ

Tema en solitario de Nillo Nández (Pacífico, Antifrágil…) cargado de intimidade e emoción.

RUBIA & THE BANDITS

A banda viguesa The Bandits, encabezada polo guitarrista Indy Tumbita, acompaña a artista Diana Rubia nesta nova aventura musical de aroma vintage.

VIMBIO

Baixo o nome de ‘Seres de luz’, a banda galega Vimbio publica novo sinxelo do que será o seu primeiro disco de longa duración, pechando así un ano 2025 no que se viviu o despegue do proxecto. O tema critica como algunha xente é capaz de escudar na corrección política para atacar a alguén por motivos persoais, agochando comportamentos hipócritas e pouco consecuentes.

BROKEN PEACH

Broken Peach regresa coa súa tradicional panxoliña de Nadal, mais este ano a novidade é que se trata dun tema de creación propia.

TONY LOMBA & ELIO DOS SANTOS

MOON CRESTA

Sinxelo de presentación do discómic Zadym, quinto álbum da banda viguesa. Sorprende o cambio do inglés ao galego, mantendo intacta a enerxía característica do cuarteto.

OLIVIER MARTIN

Segundo adianto do novo disco de Olivier Martin, o primeiro tras un longo parón.

DANI DICOSTAS

Dani Dicostas presenta ‘Estadios’, último adianto do seu terceiro longa duración, que verá a luz o 30 de xaneiro de 2026. Retrata a incrible sensación da fase 0 de calquera relación: coñecer a alguén pero non coñecelo ao mesmo tempo e estar disposta a dar todo por esa persoa. ‘Estadios’ é a canción máis coral do seu novo álbum, con arranxos de cordas e ventos e ritmos disco.

ROXANA MOURIÑO

Roxana Mouriño móstranos a través das súas cancións unha traxectoria persoal que transmite dun xeito moi especial a confluencia de estilos e estéticas da súa ampla personalidade artística. Con este ‘Raíces’, conéctanos cos espazos sonoros e xeográficos da súa biografía, levándonos directamente á Raíz, unha raíz que nace do mar.

CARLA LOURDES

A mediados de novembro Carla Lourdes publicou un EP de tres temas gravados en directo durante a súa actuación no último festival PortAmérica.

FRANS BANFIELD

Teaser do novo disco de Frans Banfield, gravado hai cinco anos. Un conxunto de seis temas de estilos moi diversos.