REVISTA ABRIL

Novidades da música local para comenzar o ano

Publicado o por

Como xa vén sendo habitual, traémosvos algunhas das últimas novidades musicais nacidas na nosa cidade. Malia que non está a ser o mellor mes para a música en directo, con moitas cancelacións na salas viguesas, os lanzamentos musicais non cesan.

Foto promocional de Eondry na Sala Kominsky | Renan Quaresma

NICOLÁS PASTORIZA

@nicolaspastoriza

O de Nicolás Pastoriza é posiblemente o primeiro disco deste ano a nivel mundial, pois publicouno en plataformas dixitais o 1 de xaneiro ás 00:01, nada máis rematar as badaladas de aninovo. Leva por título Servicio de atención al cliente, e continúa na liña que xa viña presentando nos seus anteriores traballos: melodías pop de influencia británica con efectos e ruidos varios, case todo gravado no seu estudio caseiro.

NORDE

@nordemusica

Xa nos fixemos eco na última entrega de novidades viguesas desta novísima banda de indie encabezada por Aroa Ferreiro, que agora presentan o seu segundo single, ‘El Reflejo’. Protagonizado pola actriz María Costas, o tema ofrece letras elaboradas e un apartado músical moi melódico e elegante.

SANTI ARAÚJO

@santiaraujo

E falando de elegancia, non podía faltar nesta selección Santi Araújo, que continúa adiantando cancións do que será o seu primeiro longa duración en solitario, Suelta Ø Muerde. Esta vez faino ben acompañado: Leonor Watling entona neste tema fermosos versos en galego e Xoel López actúa no videoclip. Non está de máis lembrar o fantástico EP que é Catedral, o seu debut pola súa conta tras varios anos de parón.

ISIUS

@isius_band

A banda capitaneada por José Viqueira, ex Free Serena, presenta novo tema do que será o seu seguinte álbum, Little Bighorn, que sairá o próximo mes de marzo. Indie rock enérxico ao máis puro estilo Nada Surf, Teenage Fanclub ou Silversun Pickups. Canción guitarreira e apegadiza que fala sobre “a experiencia de ter un profesor que evidencia nas súas clases que aquelo de ensinar non é o seu”.

EONDRY

@eondry

O trío de rock progresivo vén de gravar en directo un dos temas do seu único disco, 7Echoes. ‘Onihr Daed II’ foi a canción escollida para esta reinterpretación no Estudio 21G. Unha pasaxe longa e envolvente no que a banda demostra que tres membros son suficientes para crear ambientes complexos e cheos de enerxía.

ZALOMON GRASS

@zalomongrass

De menor duración é este fragmento de ‘Time Will Tell’ do trío de rock cósmico Zalomon Grass. Trátase dun teaser de Three Hunder Years, un proxecto audiovisual experimental que mestura película e concerto, aínda sen data de estrea. Nas próximas semanas irán compartindo o resto de cancións que conforman esta particular proposta.

KYOTTO

@young__kyotto

REVISTA ABRIL

Tras a publicación do seu primeiro álbum o pasado ano, o novo artista local volve co single ‘Lo escribí un mal día de noviembre’, cun videoclip gravado en diferentes localizacións da cidade. Kyotto é un dos nosos artistas con máis alcance e proxección, xa que no 2021 alcanzou a cifra de 13 millóns de reproduccións na plataforma Spotify.

BROKEN PEACH

@brokenpeach

Primeiro single do que será o próximo álbum de Broken Peach, banda famosa polas súas versións e mashups de cancións moi coñecidas. Neste caso sorprenden cun tema de propio de power pop e cun videoclip moi coidado, como vén sendo habitual nas súas producións.

The following two tabs change content below.
My LinkedIn profileMy Vimeo channel

Pablo Vázquez

Graduado en Comunicación Audiovisual pola Universidade de Vigo, é un apaixoado do cine, da música e da fotografía. É director dos documentais 'O profesor', 'The Death: el reencuentro' e 'Cuna de músicos', ademais de coautor do libro 'Son da cidade', o que lle fixo coñecer aínda máis a escena musical viguesa. Ten traballado con distintos grupos e salas da cidade, ademais de participar nos últimos anos como Xurado Novo nos festivais de cine de San Sebastián e Novos Cinemas.