Música en directo e posta do sol: regresan Os Solpores da Rebullón

Nos meses de xullo e agosto, regresa Os Solpores da Rebullón, unha proposta cultural xa consolidada que aposta por artistas locais e un formato único: concertos ao solpor nun entorno natural e familiar. Este ciclo cultural celebrarase todos os xoves nos exteriores do Centro Cultural As Pedriñas, en Tameiga (Mos).

A Comunidade de Montes de Tameiga e a Sala Rebullón organizan unha nova edición de Os Solpores da Rebullón, unha cita imprescindible do verán en Vigo que aposta pola cultura de proximidade, a música en directo e os encontros comunitarios. A súa programación arranca o 3 de xullo coa actuación de As Darbukas Dacolá e, despois, haberá concertos todos os xoves ás 21:00 h, que funcionarán con caixa inversa.

O festival ofrece unha ampla variedade de estilos e xéneros musicais que van desde o rock ata a música de autor. En xullo, ademais do grupo vigués xa mencionado, actuarán Sr Salvaje, Claudio H. + Carlos Freire + Quim Farinha, Sideburn e Pink Porris. O calendario de agosto aínda está por confirmar.

A Rebullón é un proxecto cultural, xestionado pola Comunidade de Montes de Tameiga, que, aínda que se centra fundamentalmente en concertos, ofrece numerosas actividades como cinema, danza, teatro ou presentacións de libros. Desde a súa inauguración en 2017, converteuse nunha referencia para o panorama musical galego, acadando o Premio Martín Códax da Música 2023 á mellor sala de concertos.