Kruder & Dorfmeister, Happy Mondays, Mercury Rev e León Benavente encabezan o Our Fest
O Our Fest regresa o sábado 27 de setembro a Expourense cunha cuarta edición que confirma a cidade das Burgas como un punto de encontro imprescindible para a música independente alternativa. En apenas tres edicións, o festival conseguiu atraer público de toda Galicia, distintas zonas da península e o norte de Portugal, xerando impacto cultural e social, e ofrecendo experiencias irrepetibles ao achegar artistas que, en moitos casos, visitaban Galicia por primeira vez. Entradas desde 40 € xa á venda premendo aquí.
Este 2025, o cartel preséntase como un dos máis ambiciosos ata a data. Desde Viena chegan Kruder & Dorfmeister en formato DJ Set, pioneiros do downtempo e o trip hop, cuxo legado marcou a toda unha xeración de oíntes. O seu recompilatorio The K&D Sessions converteuse en referencia universal e a súa forma de mesturar bases hipnóticas con atmosferas envolventes segue sendo un espello no que se mira boa parte da electrónica actual.
Xunto a eles estarán os lendarios Happy Mondays, responsables de dar forma ao movemento Madchester. A súa capacidade para mesturar rock, funk e psicodelia cunha actitude descarada definiu toda unha época. Con discos como Pills ’n’ Thrills and Bellyaches e cancións que aínda resoan na memoria colectiva como “Step On” ou “Kinky Afro”, o seu directo é pura celebración: unha viaxe que conecta o espírito dos noventa co presente.
Ademais, a psicodelia expansiva de Mercury Rev traerá unha das experiencias sonoras máis singulares desta edición. Desde a súa formación en Nova York a finais dos oitenta, transitaron entre o shoegaze, o pop sinfónico e a experimentación máis radical, ata asinar discos esenciais como Deserter’s Songs, elixido álbum do ano por NME en 1998. Os seus concertos, aplaudidos por medios como Rolling Stone ou The Guardian, son viaxes inmersivos onde cada tema abre un universo propio.
No apartado estatal, León Benavente reafirman o seu lugar entre os grandes nomes do rock. Formados en 2012, construíron un repertorio que mestura crudeza e lucidez cun pulso bailable e eléctrico, con discos esenciais como León Benavente, 2, Vamos a volvernos locos ou ERA. Agora chegan a Ourense con Nueva sinfonía sobre el caos, publicado en 2024, un traballo breve pero intenso que condensa toda a súa enerxía en cancións poderosas, valentes e hedonistas. O seu directo, sempre magnético, convérteos nunha das experiencias imprescindibles desta edición.
Así mesmo, o espírito inquedo e renovador do festival reflíctese na presenza de Viva Belgrado, que tras doce anos de carreira e máis de trinta países ás súas costas transformaron a intensidade do post-hardcore nunha linguaxe propia. Con discos como Bellavista e Cancionero de los cielos —este último, disco do ano 2024 para RockZone—, a banda cordobesa converte cada concerto nunha descarga catártica onde emotividade e crudeza van da man. O de Our Fest será ademais o primeiro da súa xira en Ourense, un arranque simbólico para unha das formacións máis imprescindibles da escena actual.
Finalmente, desde Londres chegan Dream Nails, trío punk feminista que combina furia e empatía nun discurso combativo e festivo a partes iguais. Con Doom Loop, aclamado por Kerrang! ou NME, consolidaron o seu salto internacional, e co seu sinxelo de 2024, Control, producido polo gañador dun Grammy Adrian Bushby, demostraron que a súa proposta pode ser tan poderosa no pogo como contaxiosa na pista de baile. A súa identidade está profundamente ligada á escena queer e á reivindicación de espazos seguros onde a música se converte nun acto de resistencia, comunidade e celebración.
