Gran presenza viguesa entre os finalistas dos Premios Martín Códax da Música
Este mércores anunciáronse os proxectos que optan a gañar na gala final da XIII edición dos Premios Martín Códax da Música, organizados pola asociación Músicas ao Vivo, e que terá lugar o vindeiro 27 de maio no Pazo da Cultura de Pontevedra. Un xurado profesional formado por cinco especialistas vinculados á música elixiu os 48 proxectos que optarán aos premios nas diferentes 15 categorías musicais, artista emerxente e organistrum.
Ao acto, celebrado na terraza das Bodegas Martín Códax, acudiron os 57 finalistas que pasan á segunda fase de votación ademais de representantes das institucións colaboradoras nestes galardóns. 48 proxectos escollidos por un xurado profesional de renome formado pola pianista e investigadora artística María Domínguez, a artista Blanca Pereira, coñecida como Rumia, o guitarrista da banda Brutal, Isidro Otero, o xornalista Luis Pardo, e a xestora cultural Marta Horjales. A partir do 7 de maio, o público e os socios e socias de MAV (Músicas ao Vivo) poderán elixir os seus proxectos favoritos desde a páxina web.
Entre os artistas vigueses e da contorna seleccionados atopamos a Sabela Cereijo, Guilherme Zapata, Borken Peach, Stoned at Pompeii, Hugo Guezeta, Manuel Cebrián, Nadadora, Montedapena, Michu da Rocha, Alejo Amoedo, Raze, Marta Vidal, Golfiños, Ollo Piollo e Abril. Na categoría Organistrum tamén temos ao xornalista Rodri Míguez, o Festival Alternativo Millo Verde de Redondela e a sala La Fábrica de Chocolate.
Dentro das 15 categorías musicais, artista Emerxente e organistrum, os proxectos seleccionados foron os seguintes:
- METAL E HEAVY: Urko, Keepers e Talesien
- CANCION DE AUTOR/A: Antía Muíño, Sangre de Muérdago e Zeltia Irevire
- BLUES, FUNK E SOUL: Sabela Cereijo, Allo Negro e Guilherme Zapata
- ELECTRÓNICA: Galician Army, Kike Varela e Løch
- ROCK E PUNK: Loita Amada, Broken Peach e Stoned at Pompeii
- MÚSICAS URBANAS: Hugo Guezeta, Habló Pablo e Lumedollop
- ORQUESTRAS, GRUPOS E MÚSICA DE VERBENA: Lamatumbá, Orquestra Bravú Xangai e La Fórmula
- MÚSICA CLÁSICA E CONTEMPORÁNEA: Alejo Amoedo, Ensemble Alletamento e María Mendoza
- JAZZ E MÚSICAS IMPROVISADAS: Xan Campos “Amorodios”, María Toro e Manuel Cebrián-punctum
- POP E INDIE: Nadadora, Montedapena e Michu da Rocha
- MÚSICAS DO MUNDO E MESTIZAXE: Lidia India, Marta Vidal e Abril Fado Atlántico
- MÚSICA INFANTIL: Paco Nogueiras, Ollo Piollo e Golfiños
- MÚSICA FOLK: Abril, Alana e Guezos
- MÚSICA TRADICIONAL: Unto Vello, Donicelas e Carapaus
- BANDAS DE MÚSICA POPULAR: Banda de Música Municipal de Celanova, Banda Da Escola Municipal De Música De Oleiros e Banda De Música Xuvenil De Torroso
- ARTISTA EMERXENTE: Raze, Lula Mora e Apolo18
Premios Organistrum:
- Organistrum COMUNICACIÓN E DIFUSIÓN MUSICAL: Galicia En Concierto, A Canle De Rodri Míguez e Fogar dos Festivais
- Organistrum FESTIVAIS: Festival Arteficial, Surfing the Lerez e Festival Alternativo Millo Verde
- Organistrum SALAS: Sala Capitol, La Fábrica de Chocolate e Krazzy Kray!
O premio honorífico Músicas ao Vivo, destinado a distinguir unha traxectoria de especial relevancia para a música galega, desvelarase nas seguintes semanas.