Girando por salas trae catro bandas a Vigo este outono
O circuito nacional de música ao vivo Girando por Salas trae catro concertos a nosa cidade este outono. Colectivo Da Silva, María Guadaña, Zetak e Suu actuarán entre outubro e novembro en diferentes salas de Vigo.
A duodécima edición do circuíto Girando por salas programa este outono 88 concertos por todo o Estado. Seguindo coas cifras, de 908 artistas inscritos seleccionáronse 26 nomes. Entre eles, o do músico vigués Pablo Lesuit, que non xoga na casa con esta proposta, porque un dos requisitos do circuíto é que os seleccionados actúen a un mínimo de 300 quilómetros lonxe da Comunidade Autónoma en que residan. Con isto, a organización quere potenciar os talentos musicais emerxentes alén do ámbito de influencia natural. Ademais, os artistas reciben unha axuda para a produción e promoción discográfica do traballo.
Grazas a esta iniciativa, as letras pegadizas dos granadinos Colectivo Da Silva poden soar o sábado 15 no bar Sinatra; os sete compoñentes desta agrupación formada en 2017 presentan o disco Casa Vargas, producido por Aaron Rux. A seguinte cita é o 5 de novembro coa actuación de María Guadaña na sala La Fábrica de Chocolate co disco Latidos y culebras (continuación de Remedios paganos, que foi un dos debuts máis prometedores do 2019); a xienense continúa mesturando a aridez do rock desértico coa exuberancia do folclore latino. A música electrónica chega da man do grupo navarro Zetak, que actúa o 11 de novembro na mosense sala Rebullón; con Pello Raparaz como cara visible, a agrupación non renuncia á melodía e luminosidade do pop no último disco, Zeinen ederra izando den. Pecha o ciclo a barcelonesa Suu, que presenta Karaoke en La Pecera o 12 de novembro; as oito cancións que compoñen este terceiro disco desta artista catalá teñen un dobre obxectivo: celebrar e desinhibirse.
Nesta ligazón podedes ver o calendario completo de #GPS12. Vémonos nas salas!
CONCERTOS GIRANDO POR SALAS EN VIGO
15 de outubro – Colectivo Da Silva (Sala Sinatra)
5 de novembro – María Guadaña (La Fábrica de Chocolate)
11 de novembro – Zetak (Sala Rebullón)
12 de novembro – Suu (La Pecera)
Tamara Novoa
Últimos posts de Tamara Novoa (ver todos)
- Antón Bouzas, activista: «A revolución no modelo desta cidade debería facerse desde as asociacións veciñais» - 31 Agosto, 2026
- Lista dos artistas vigueses que tocaron en Castrelos desde 1983 ata hoxe - 19 Agosto, 2026
- A música en directo volve aos chiringuitos de Vigo - 4 Agosto, 2026
- Cecilia F. Santomé: «Trátase de escribir cos ollos antes que coas mans» - 21 Xullo, 2026
- 15.000 espectadores acreditan o bo facer da Sala Ártika - 1 Xullo, 2026