REVISTA ABRIL

Matamá debulla o millo e a tradición na festa da recolleita

Publicado o por

Toca recoller o sementado. Ben o saben en Matamá, onde esta fin de semana se celebra a festa da Recolleita. Unha celebración que dá continuidade a Sementeira celebrada a finais de abril. As familias que se acheguen ao evento recollerán o millo e poderán gozar das numerosas actividades e actuacións programadas para a tarde e noite do sábado.

REVISTA ABRIL

Outrora, os ciclos de cultivo marcaban as celebracións, unha tradición que están empeñados en recuperar na parroquia de Matamá. O pasado mes de abril o Colectivo Malaherba celebrou a Festa da Sementeira, na que grandes e pequenos participaron no cultivo dun campo de millo e este sábado terá lugar a Festa da Recolleita.

O evento comezará ás 17:00 cunha andaina musical a cargo de Ce Orquestra Pantasma. Un percorrido de un quilómetro ata a leira onde se procederá á recollida do millo. Unha vez alí, toda a xente participará na carga do podón coa espiga no carro de bois e despois todos xuntos emprenderán de novo o camiño de volta. No lugar da festa, emprazada ao carón dun muíño rehabilitado, procedérase a esfollar o millo separando as espigas e trasladarase o gran ao hórreo. Os veciños máis maiores da parroquia participan en todo o proceso e o explicarán aos máis novos, pois o obxectivo desta celebración é o de transmitir estes coñecementos e achegar as novas xeracións á terra. As cantareiras Bouzacova amenizarán a esfollada cos seus cánticos e a partir das 20:00 Asacocirco ten preparado un espectáculo infantil con teatro e malabares que de ben seguro fascinará aos pequenos. A partir das 21:00 horas terá lugar un bingo musical no que as risas están aseguradas. Pois trátase dun bingo moi singular no que non se cantarán só as liñas senón que será un bingo karaoke. La Chata Soul ás 22:00 e Os Putos ás 23:00 serán os encargados de pechar a festa.

Unha moi boa oportunidade para achegarnos á natureza da que cada vez estamos máis desligadas e coñecer as labores do campo de primeira man.

(GMT+01:00) Matamá

The following two tabs change content below.
My Twitter profileMy Facebook profileMy LinkedIn profileMy Instagram profile

Tamara Novoa

Xornalista por vocación. Marchou a Londres estudar un master en Xornalismo Internacional e tras traballar varios anos en Barcelona nunha Asociación sen ánimo de lucro, decide volver ao seu Vigo natal. Na actualidade é unha das creadoras deste proxecto. O que lle permite desenvolver unha das tarefas polas que sinte maior paixón: contar historias relacionadas coa cultura e a movida da súa ben querida cidade olívica.