A XXXVIII Romaría do Pan de Millo volverá reunir gastronomía, tradición e música popular o domingo 30 de agosto no parque forestal de Cotogrande, en Cabral. Organizada polo Centro Cultural e Recreativo de Cabral, a cita naceu en 1986 coa intención de poñer en valor un dos produtos máis tradicionais da gastronomía galega e está recoñecida pola Xunta de Galicia como festa gastronómica, ademais de figurar como actividade turística.

O gran protagonista volverá ser, como indica o propio nome da romaría, o pan de millo, que poderá degustarse só, con pasas ou con pasas e noces. Ao seu redor haberá unha ampla oferta de comida tradicional con sardiñas asadas, polbo á feira, churrasco con criollos e patacas, empanadas de millo e de trigo, empanadillas e pan de trigo, ademais de servizo de cafetería. Todo se ofrecerá a prezos populares e a comida estará dispoñible ata esgotar existencias.

A actividade comezará arredor das 10:00 horas e prolongarase ata aproximadamente as 21:00 horas. A música e o baile tradicional acompañarán toda a xornada: desde as 12:00 horas actuarán o Grupo Folclórico Airiños da A.C. O Coto-Cabral e a Agrupación Musical Lira de San Miguel de Oia. Pola tarde, a partir das 17:00 horas, chegarán a Charanga Os Imperiais das Neves e a Banda de Gaitas Cotogrande do C.C.R. Cabral, mentres que o peche correrá a cargo do grupo de cantos populares Os Silandeiros do C.R.C. Torroso.

A romaría contará tamén cunha mostra de produtos do campo, aberta ás persoas que queiran levar os mellores froitos das súas hortas. Quen participe recibirá un recordo da festa e entrará en sorteos de diferentes agasallos. Ademais, celebrarase o sorteo dun cheque de 500 euros, con rifas a 2 euros, e os premios repartiranse durante a tarde.

Outro dos elementos característicos da cita será a presenza de peñas cabalares, para as que se están acondicionando zonas específicas dentro do recinto. A organización destaca tamén que haberá amplo aparcadoiro gratuíto, facilitando así pasar o día completo en Cotogrande.