A Sala Rebullón acollerá unha mostra de fin de curso que representará o grupo de Xogo Teatral que ensaia no CSCD As Pedriñas, en Tameiga. Trátase dunha adaptación de Marta Failde a partir de “O principiño”, de Antoine de Saint-Exupéry, protagonizada por vinte rapazas e rapaces dos 5 ao 16 anos de idade.

Na obra, un grupo de principiños e principiñas emprende unha viaxe entre estrelas, planetas e encontros extraordinarios, para descubrir algunhas das preguntas máis importantes da vida: que significa mirar de verdade, crear vencellos, coidar das persoas que queremos ou atopar o noso lugar no universo.