Os participantes poderán probar o excitante xogo en vivo inspirado na película The Thing. En O enigma de outro mundo, os xogadores converteranse en membros dunha estación antártica. Dous días atrás, atoparon unha estraña criatura baixo o xeo que logrou infectar a un deles antes de morrer. Agora a estación está ao bordo do colapso: en menos de dúas horas converterase nunha tumba xeada e deben evacuala.

Cada un dos participantes encarnará a un membro da base, co seu cargo correspondente (médico, enxeñeiro, bióloga…) e tamén cun trazo oculto. Polo menos un deles estará controlado polo ente alieníxena, aínda que aparente ser normal. Os humanos deben abandonar a estación e impedir que os infectados escapen. Pola súa banda, o alien só precisa que un dos seus consiga chegar ao seguinte núcleo de poboación.