Xa están abertas as inscricións para a XLII Carreira Nocturna de San Xoán, unha das citas deportivas máis tradicionais do calendario vigués. A proba, organizada pola Agrupación Viguesa de Atletismo e integrada no circuíto Run Run Vigo, celebrarase o vindeiro 23 de xuño cun percorrido urbano de aproximadamente 7,7 quilómetros. As persoas interesadas poderán anotarse ata o 20 de xuño a través da plataforma Magmasport.

A saída terá lugar na Praza do Rei e o percorrido avanzará por Camelias, Pi i Margall, López Mora, a Avenida da Coruña, Tomás A. Alonso e Beiramar ata rematar nos soportais do Berbés. A carreira está aberta a persoas maiores de 14 anos, estean ou non federadas.

Como é habitual nesta cita vinculada ás celebracións de San Xoán, a xornada contará cun ambiente festivo máis alá da competición. Ao remate da proba, as persoas participantes poderán desfrutar dunha sardiñada popular no Berbés, ademais de sorteos e premios para os primeiros clasificados de cada categoría.

A Carreira Nocturna de San Xoán é a oitava cita do circuíto Run Run Vigo 2026, o programa que reúne algunhas das principais carreiras populares da cidade. Nesta edición, o calendario sufriu cambios tras a cancelación da Carreira da Cereixa de Beade, prevista inicialmente para o mes de xuño, ao non obter os permisos necesarios para a súa celebración.

Calendario Run Run Vigo 2026

• Subida ao Castro – 26 de xaneiro (FINALIZADA)
• Calvario 5+5 – 16 de febreiro (FINALIZADA)
• 10K de Teis – 9 de marzo (FINALIZADA)
• Vig-Bay – 6 de abril (FINALIZADA)
• Praia de Samil – 27 de abril (FINALIZADA)
• Carreira da Cereixa – 25 de maio (CANCELADA)
• Correndo por Vigo – 14 de xuño
• Carreira Nocturna de San Xoán – 23 de xuño
• Vigo Contra o Cancro – por confirmar
• La 21 – 16 de novembro
• Vigo +11 – por confirmar
• Érguete e Corre – 30 de novembro