Visita guiada Andrea Costas

A exposición Desapego, de Andrea Costas Lago (MARCO, 1º andar) apura os seus últimos días de apertura ao público antes da súa clausura, o domingo 2 de xullo.

Continuando coas accións de difusión que acompañaron esta mostra, e como peche do proxecto, o público terá ocasión de percorrer a exposición na compaña da propia artista, que ofrecerá varias visitas guiadas: tres novas oportunidades para afondar na orixe e contidos desta proposta, e para alimentar a nosa percepción a través dun relato en primeira persoa.

As visitas terán lugar este domingo 25 de xuño ás 12.00, o xoves 29 de xuño ás 19.00, e o domingo 2 de xullo ás 12.00, coincidindo co día de clausura da exposición. Non é necesaria inscrición.