VII GALICIA MAGIC FEST

Os mellores magos do mundo volven ao Teatro Afundación os días 26 e 27 de decembro co VII festival internacional de maxia Galicia Magic Fest. Seis prestixiosos ilusionistas de latitudes diversas cítanse no teatro máis sobranceiro da cidade para deixarnos coa boca aberta con trucos nun grande espectáculo familiar de 90 minutos que desafía a lóxica para o abraio de grandes e pequerrechos. Aquí hai máis luces ca no Nadal.

Jessica Guloomal (Canarias) é a primeira muller española en gañar o Premio Nacional de Maxia na categoría de mentalismo e, ademais, a encargada de poñer en marcha a ilusión nesta edición do festival máxico.

Jun Woo Park (Corea do Sur) está considerado actualmente como o mellor mago do mundo na especialidade de manipulación. Gañou prestixio a través dunha chea de concursos, entre os que destacan diferentes edicións mundiais de Got Talent.

Eric Chien (China) é un mago que a organización do festival levaba tempo querendo traer a Galicia é outro deses ilusionistas que arrasaron en diferentes edicións do programa Got Talent a través do mundo.

Mag Marín (Cataluña), un ilusionista que crea e recrea situacións e momentos máxicos cargados de humor, percorre os máis importantes festivais de maxia a nivel europeo e resultou gañador do programa Pura magia de Televisión Española.

Mikael Szanyiel (Francia) é un excéntrico director de orquestra ao que lle pasan cousas de meigas; en dúas ocasións resultou vencedor na categoría de maxia cómica no Campionato Mundial de Maxia da Federación Internacional de Sociedades Máxicas (FISM).

Pedro Volta (Galicia) é o promotor, director artístico e mestre de cerimonias de Galicia Magic Fest. A maxia é a súa vida, que chegou a arriscar nunha semifinal de Got Talent. Con ela foi embaixador do Instituto Cervantes en Australia, colaborador da Radio Galega e autor do libro O pazo máxico: a túa primeira escola de maxia.

Data e hora: martes 26 e mércores 27 de decembro, ás 18:00 h e 20:30 // Lugar: Teatro Afundación // Prezo: desde 12,00 € (gratis para menores de 2 anos que non ocupen butaca) // Idade recomendada: todos os públicos

Entradas