Segunda edición de Verbenas na Caridade, o ciclo de música organizado pola Orquestra Clásica de Vigo no único claustro barroco da cidade, que se atopa no interior da Casa da Caridade, unha institución histórica sita no alto do barrio do Berbés que centra o seu labor en atender ás persoas máis necesitadas de Vigo. Alí a orquestra revivirá a tradición da música lixeira de principios do século XX nun formato festivo que fusiona cultura, barra de bar, mercadiño benéfico e compromiso social.

A programación musical divídese en tres citas temáticas específicas:

• Mércores 1 de xullo — Zarzuelas de Salón: Un percorrido instrumental polas zarzuelas de pequeno formato que foron deseñadas especificamente para ser interpretadas nos salóns da burguesía da época.
• Mércores 8 de xullo — A Noite Recreada: Os valses, polcas, mazurcas e pasodobres que facían bailar ao sur de Galicia resoan de novo en formato de salón a través do piano de Alejo Amoedo.
• Mércores 15 de xullo — Orquestina: Unha viaxe no tempo pola música que enchía de vida os emblemáticos cafés de Vigo na primeira metade do século XX da man da propia Orquesta Clásica.

A NOITE RECREADA, con Alejo Amoedo:

O segundo dos das propostas que levarán a música este ano ao claustro da Casa da Caridade será a cargo do pianista Alejo Amoedo e levará por título “A noite recreada”. Un concerto que nos convida a viaxar no tempo para revivir o esplendor da música de salón de finais do século XIX e comezos do XX.

Neste recital, Amoedo rescatará partituras esquecidas de compositores do sur de Pontevedra que deron forma á auténtica banda sonora dos nosos antepasados; melodías que adoitaban interpretarse nun ambiente íntimo e doméstico arredor do piano familiar antes de saltar aos salóns públicos e ás rúas. A través dun repertorio vibrante e refinado, o público poderá gozar dunha viaxe polos ritmos que movían a sociedade da época: dende as elegantes mazurcas e as alegres polcas, ata os solemnes pasodobres e os sedutores compases de influencia americana como as habaneras (ritmos latinos de Cuba) e os primeiros tangos.

Como broche de ouro e mostra da riqueza patrimonial, o concerto incluirá pezas tan significativas como unha muiñeira de autoría feminina ou unha emocionante rapsodia de cantos galegos.

Alejo Amoedo é doutor, investigador, académico da Real Academia de Belas Artes de Galicia, membro do Consello da Cultura Galega, divulgador, profesor do Conservatorio Superior de Música de Vigo, coleccionista e sobre todo pianista. Un auténtico puntal para a conservación do patrimonio musical galego que nos ofrecerá unha proposta que demostrará a importancia destas pequenas formas musicais.

A Casa da Caridade abrirá as súas portas os tres primeiros mércores do mes cos mesmos horarios para poder gozar do espazo con calma. A apertura de portas será ás 19:30 h para comezar a gozar da música ambiental, o ambigú e o mercadiño benéfico, mentres que os concertos arrancarán oficialmente ás 21:00 h, botando o peche ao remate dos mesmos.

As entradas para asistir ao ciclo teñen un prezo de 13 euros se se adquiren de xeito anticipado e de 15 euros no despacho de billetes o propio día do evento, sendo o acceso totalmente de balde para os menores de 16 anos.