O Miúdo Fest alcanza a súa décima edición consolidado como o evento de referencia para o público familiar na área de Vigo. Organizado polo CSCD As Pedriñas, o festival celebra este aniversario ampliando a súa duración a seis días e mantendo o seu principio fundamental: o acceso libre e gratuíto a todas as actividades. Aínda que a programación comeza este martes con sesións en centros educativos, o groso das actuacións abertas ao público xeral concentrarase entre este venres e o domingo na contorna da Sala Rebullón.

VENRES 15:

A programación de fin de semana ábrese este venres ás 18:00 h cunha proposta escénica de gran formato. O grupo de teatro do IES de Mos levará ás táboas da Sala Rebullón a súa versión de Hamlet. Esta adaptación do clásico de Shakespeare busca achegar a literatura universal aos máis novos a través dunha posta en escena dinámica.

SÁBADO 16:

O sábado, a actividade trasládase ao escenario exterior do CSCD As Pedriñas con dous pratos fortes da escena galega:

• 17:00 h – Peter Punk: Un dos artistas de circo e clown máis recoñecidos polo seu estilo irreverente e a súa capacidade de interacción, presentará un espectáculo que combina malabares, humor e crítica.
• 18:00 h – Cé Orquestra Pantasma: César Freiria, o polifacético “home orquestra”, ofrecerá un concerto que percorre desde a música tradicional ata o punk, utilizando unha ampla variedade de instrumentos de forma simultánea.

DOMINGO 17:

O festival clausurará a súa décima edición o domingo ás 19:00 h co concerto de Uxía Lambona e a Banda Molona. A formación, líder no sector da música infantil en Galicia, presentará o seu repertorio de clásicos populares pasados polo guecho do rock, o ska e o rap, garantindo un peche festivo para todas as idades.

ACTIVIDADES EN CENTRO EDUCATIVOS:

De forma paralela, o X Miúdo Fest mantén o seu compromiso pedagóxico visitando distintos colexios de Mos durante a semana. Artistas como High Paw, Brais das Hortas ou o espectáculo O Baúl da Tía Tola levarán a música e o teatro directamente ao alumnado, reforzando a presenza do festival na comunidade escolar.