A Feira de Adopcións de Moaña regresa esta fin de semana ao Palco da Música cun programa pensado para dar visibilidade aos animais que aínda agardan unha familia e, ao mesmo tempo, recadar fondos para as asociacións que se encargan do seu coidado.

Ao longo dos dous días participarán varias protectoras, entre elas Patudos Peludos, que contará cun posto propio con chaveiros, fundas de coxín, marcapáxinas, pousavasos ou xoiería. Haberá tamén unha mesa común de comida e bebida solidaria, cuxa recadación servirá para apoiar o labor das entidades participantes. A organización anima a colaborar doando doces, tortillas, empanadas ou outros produtos para esta mesa.

Pero a feira vai máis alá dos postos informativos. O sábado 29 ás 18:00 h abrirá a programación o contacontos de Swaiper, el perro de la eterna sonrisa, seguido ás 19:30 h dun concerto de Chispaneira e Willy Santomé.

O domingo terá un carácter especialmente familiar, cun inchable a prezos populares e un obradoiro de chapas ás 12:30 h. Xa pola tarde chegará un dos momentos máis importantes da feira: ás 17:00 h terá lugar o paseo cos cans das diferentes protectoras e, ás 18:00 h, o tradicional desfile de peludos en adopción.

A cita combina así sensibilización, lecer e recadación solidaria, convertendo durante dous días o centro de Moaña nun punto de encontro entre protectoras, familias e persoas interesadas en axudar —adoptando, mercando nos postos ou simplemente facendo unha achega—.